காவிகள், கார்ப்பரேட்கள் கைகளில் கந்தரகோலமாகும் கல்வி

இப்படியெல்லாம் கூட யோசிக்க முடியுமா? இந்த அளவுக்கு புராண குப்பைகளையே புனிதமாக்கி கல்வி என்ற பெயரில் பாடத் திட்டம் உருவாக்க முடியுமா? பணம் பறிப்பதற்காகவே தேர்வு முறைகளை திட்டமிட்டு, எளியோர்களுக்கு கல்வியை எட்டாக்கனியாக்க முடியுமா? நீட் தேர்வின் பின்னுள்ள சதிகள் என்ன? அதிர்ச்சியூட்டும் உண்மைகளை அம்பலப்படுத்துகிறார்கள் கல்வியாளர்கள்;

அகில இந்திய கல்விப் பாதுகாப்புக் கமிட்டியின் கருத்துப் பட்டறை கொல்கத்தாவில் சென்ற மாதம் ( ஜுலை 18,19,20 என மூன்று நாட்கள் நடந்தது. இதில், இந்தியா முழுவதிலும் இருந்து வருகை தந்த கல்வியாளர்கள் தற்போது இந்தியக் கல்வி முறையில் நிகழ்ந்து கொண்டிருக்கும்  கார்ப்பரேட் மயமாக்கல்,  தேசிய கல்விக் கொள்கை என்ற பெயரில் வணிகச் சுரண்டல்கள்,  ‘இந்திய பாரம்பரிய ஞான மரபு  (IKS) என்ற பெயரிலான  மூட நம்பிக்கை திணிப்புகள், நீட் (NEET) தேர்வின் சமூக அநீதிகள், பொதுக் கல்வி அடைந்துள்ள சீரழிவுகள் ஆகியவை குறித்த அதிர்ச்சியூட்டும் தகவல்களை பகிர்ந்து கொண்டனர்.

இந்திய அறிவு கட்டமைப்பு முறை எப்படி பள்ளிகளிலும், உயர்கல்வி தளத்திலும் செயல்படுத்தப்படுகிறது என்ற தலைப்பில் பேராசிரியர் திருபாஜோதி முகர்ஜீ  பேசியதாவது;

புதிய கல்விக் கொள்கை (NEP) நவீன இந்திய சிந்தனை தளத்தில் சமஸ்கிருதத் திணிப்பையும், அறிவியல் பூர்வமற்ற மூட நம்பிக்கைகளையும்  விதைப்பது குறித்த விரிவான ஆய்வுப் பகுதி இது வாகும்.

பாரம்பரிய இந்திய ஞான மரபு என்ற பெயரில் மூட நம்பிக்கையையே அறிவியலாகபாடத்திட்டம் முழுவதிலும் உள்ளது.  இதில் சமஸ்கிருதத்திற்கு  அதிகமான முக்கியத்துவம் அளிக்கப்படுவதோடு, அரசியல் லாபங்களுக்காகவும்  இந்துத்துவ சித்தாந்தத் திணிப்பு நடக்கிறது.

# 7,000 ஆண்டுகளுக்கு முன்பே ‘சுந்தர விமானம்’, ‘திரிபுரா விமானம்’ மற்றும் புஷ்பக் விமானம் இருந்ததாகவும், 1,000 ஆண்டுகளுக்கு முன்பே ட்ரோன்கள் பயன்பாட்டில் இருந்ததாகவும் சிவராஜ் சிங் சௌஹான் போன்ற அரசியல் தலைவர்களால் அபத்தமான கருத்தாக்கங்கள் பதிவிடப்பட்டன.

# ”பசு மட்டுமே ஆக்சிஜனை வெளியிடும் விலங்கு என்றும், அதைத் தடவினால் சுவாசப் பிரச்சனை குணமாகும்” என்றும் உத்தராகண்ட் முன்னாள் முதல்வர் கூறியதும்; மாட்டு மூத்திரம் கொரோனாவைக் குணப்படுத்தும், மாட்டுச் சாணம் மார்பகப் புற்றுநோயைக் குணப்படுத்தும் எனச் சாத்வி பிரக்யா போன்றோர் பரப்பிய மருத்துவ ரீதியாக நிரூபிக்கப்படாத கூற்றுகளும் அடங்கும்.

இதற்கு ஐஐடி இயக்குநர் காமகோடி  போன்ற உயர் கல்வி நிறுவன தலைவர்கள் ஆதரவு தெரிவித்தது மேலும் கவலையளிக்கிறது.

#  ”மகாபாரத காலத்திலேயே இன்டர்நெட் மற்றும் செயற்கைக்கோள் தொழில்நுட்பம் இருந்தது” எனத் திரிபுரா முன்னாள் முதல்வர் பிப்லப் தேவ் கூறியதும், பண்டைய காலத்திலேயே அணுசக்தி சோதனைகள் நடத்தப்பட்டதாக ரமேஷ் போக்ரியால் நிஷாங்க் பேசியதும் அறிவியல் வரலாற்றுக்கு எதிரானவையாகும்.

#  பரிணாமக் கோட்பாடு நீக்கம்: டார்வினின் பரிணாமக் கோட்பாட்டை ஒரு கேலிச்சித்திரம் எனக் கூறி பாடப் புத்தகங்களிலிருந்து நீக்க முன்னாள் மத்திய அமைச்சர் சத்யபால் சிங் வலியுறுத்தியது, மாணவர்களின் அடிப்படை அறிவியல் சிந்தனையை முடக்கும் முயற்சியாகும்.

#  பண்டைய இந்தியாவிலேயே பிளாஸ்டிக் சர்ஜரி மற்றும் மரபியல் நுட்பங்கள் இருந்ததாகப் பிரதமரால் குறிப்பிடப்பட்டதும், ஐன்ஸ்டீனின் E=mc2 கோட்பாட்டை விடச் சிறந்த கோட்பாடுகள் வேதங்களில் உள்ளதாக ஸ்டீபன் ஹாக்கிங் கூறியதாக முன்னாள் அமைச்சர் ஹர்ஷ் வர்த்தன் தவறாக மேடைகளில் முழங்கியதும் இதற்குச் சான்றுகளாகும்.

#  ”காந்தாரியின் 100 கெளரவர்கள் பிறப்பு என்பது பண்டைய ஸ்டெம் செல் (Stem Cell) ஆராய்ச்சி” என்றும், விஷ்ணுவின் ”சுதர்சன சக்கரம் என்பது பண்டைய வழிகாட்டப்பட்ட ஏவுகணை (Guided Missile)” என்றும் இந்திய அறிவியல் காங்கிரஸிலேயே (Indian Science Congress) முன்னாள் துணைவேந்தர் ஜி. நாகேஸ்வர ராவ் பேசியது அறிவியலாளர்களிடையே கடும் அதிர்ச்சியை ஏற்படுத்தியது.

#  பாரதிய சிக்ஷன் மண்டல் (BSM) போன்ற அமைப்புகளின் மூலம், கல்வி அமைப்பைத் ‘தேசியமயமாக்கல்’ என்ற பெயரில் ஒருதலைப்பட்சமாக மாற்றியமைக்கும் முயற்சிகள் முடுக்கப்பட்டுள்ளன. சிந்து சமவெளி நாகரிகத்தை வைதீக நாகரிகத்தின் ஒரு பகுதியாகக் காட்டும் முயற்சி தீவிரமாக நடைபெறுகிறது; ஆனால், இதற்கு எவ்விதத் தொல்பொருள்  அல்லது மரபியல் ஆதாரங்களும் இல்லை. பண்டைய வரலாற்று நுட்பங்களை “அறிவியல் பூர்வமாக ஆய்வு செய்ய வேண்டுமே” தவிர, புராணங்களைப் வரலாற்று உண்மைகளாகக் கற்பிக்கக் கூடாது.

மேலும், அப்போதைய தொழில்நுட்பத் திறன்கள் ஏன் வரலாற்று ரீதியாக மறைந்து போயின என்பதையும் பகுத்தறிவுடன் ஆராய வேண்டும்.

# வரலாறு திரிபும் விமர்சனப் பார்வையின் இழப்பும் (Distortion of History Facts);

பாரம்பரிய இந்திய ஞான மரபு என்பது குறிப்பிட்ட இந்துத்துவ அரசியல் சித்தாந்தத்தைப் பரப்புவதற்கான ஒரு கருவியாகப் பயன்படுத்தப்படுகிறது. இந்திய வரலாற்றின் பன்முகத் தன்மையையும்  பிற பண்பாடுகளின் பங்களிப்பையும் முற்றிலுமாகப் புறந்தள்ளி, வைதீக  காலத்திற்கு மட்டும்  அதிகமான முக்கியத்துவம் அளிக்கப்படுகிறது.

இத்தகைய தொடர்ச்சியான வரலாற்றுத் திரிபுகளினாலும் போலி அறிவியல் திணிப்பினாலும், தகுந்த ஆதாரங்கள் மற்றும் நடுநிலையான ஆய்வுகளைச் சார்ந்த ‘விமர்சனப் பூர்வமான கல்விப் பார்வை’ (Critical Academic Perspective) மாணவர்களிடையே முற்றிலுமாக சிதைக்கப்பட்டு, நாட்டின் அறிவியல் வளர்ச்சிக்கே பெரும் பின்னடைவை ஏற்படுத்துகிறது.

AISEC ஒரிசா மாநில செயலாளர், சுபாஷ் நாயக் அவர்கள், சமீபத்தில் திருத்தப்பட்ட NCERT புத்தகங்கள் எவ்வாறு அறிவியல்,  வரலாறு, கணிதப் பாடங்களை திருத்தி பலவித தவறான பொருண்மைகளை புகுத்தியுள்ளன என பலவித சான்றுகளுடன் விளக்கினார்.  அவைகளின் தன்மைகள் புரிய ஒன்றை மட்டும் இங்கே தருகிறோம்.

7ஆம் வகுப்பு சமூக அறிவியல் புத்தகம் – “நிலம் எவ்வாறு புனிதமடைகிறது?”

மலைகள் அவற்றின் உயரத்தின் காரணமாக, பூமியிலிருந்து சொர்க்கத்திற்குச் செல்லும் ஒரு அடையாள நுழைவாயிலாகக் கருதப்படுகின்றன. அதனால் தான் இந்தியாவில் பல தீர்த்தத் தலங்களும் கோயில்களும் மலை உச்சிகளில் அமைந்துள்ளன; ஏனெனில், இந்தச் சிகரங்களை அடைவதற்காக மேற்கொள்ளப்படும் பயணமானது, இறைவனைச் சென்றடைவதற்கான ஒரு குறியீட்டுப் பயணமாகக் கருதப்படுகிறது.

இவ்வாறாக எண்ணற்ற இடங்களில் பாடப்புத்தகங்களின் வாயிலாக  பிஞ்சுக் குழந்தைகளின் மனதில் மூட எண்ணங்களை விதைக்கின்றனர்.

பேராசிரியர் சந்திரசேகர் சக்கரவர்த்தி, (முன்னாள் துணைவேந்தர்):

தற்போதைய கல்விக் கொள்கைகள் யாவும் தனியார் மற்றும் பெரு நிறுவனங்களின் (Corporate) விருப்பங்களுக்கு ஏற்பவே திட்டமிட்டு வடிவமைக்கப்படுகின்றன. இத்தகைய கார்ப்பரேட் மயமாக்கலின் விளைவாக, கல்வித் துறையில் தனியார் பயிற்சி மையங்கள் அதிகரித்து, மாணவர்களுக்கு கல்வி அழுத்தம் தந்து தற்கொலைகளுக்கு வழி வகுக்கிறது.

கற்றலின் ஆன்மாவாகத் திகழும் பயிற்றியம் எனப்படும் கற்பித்தலியல் (Pedagogy), தேசிய  கல்விக் கொள்கையில் (NEP 2020) தவறாகக் கையாளப்பட்டுச் சீரழிவைச் சந்தித்துள்ளது. சிபிஎஸ்இ (CBSE) போன்ற அமைப்புகளில் “அனுபவவழிக் கற்றல்” போன்றவை நடைமுறையில் மாணவர்களையும் ஆசிரியர்களையும் முறையான அறிவை பெற முடியாமல் பலவீனப்படுத்துகிறது.

மையப்படுத்தப்பட்ட கல்வியின் விளைவுகள்: தன்னாட்சி மற்றும் தேர்வு முறைகளின் சிதைவு  குறித்து கல்வியாளர் இராஜசேகர்;

1991-ஆம் ஆண்டின் பொருளாதாரத் தாராளமயமாக்கல், உலகமயமாக்கல் மற்றும் தனியார்மயமாக்கல் (GLP) கொள்கைகளுக்குப் பிறகு, இந்தியாவின் பொதுக் கல்வித் துறை ஒரு பெரும் கட்டமைப்புச் சரிவைச் சந்தித்து வருகிறது. மாநிலப் பல்கலைக்கழகங்களின் தன்னாட்சி (Institutional Autonomy) படிப்படியாகப் பறிக்கப்பட்டு, மத்திய அரசின் அதிகப்படியான தலையீடுகளும் அரசியல் அழுத்தங்களும் தீவிரமடைந்துள்ளன.

பொதுக் கல்வியை வலுப்படுத்த மக்களிடமிருந்து வசூலிக்கப்படும் ‘கல்வி வரி’ (Education CESS) தொகையானது, அதன் முதன்மை நோக்கத்திற்காகப் பயன்படுத்தப்படாமல், மத்திய அரசின் தொகுப்பு நிதியில் முடக்கப்பட்டு, பிற சிறப்புத் திட்டங்களுக்குத் திருப்பி விடப்படும் நிதியியல் முறைகேடாக மாறிக் கிடக்கிறது. அதேபோல், ராஷ்ட்ரிய உச்சதர் சிக்ஷா அபியான் (RUSA) போன்ற திட்டங்கள் பல்கலைக்கழகங்களை நிரந்தரமாகப் பராமரிப்பதற்கான நிதியை அளிப்பதற்குப் பதிலாக, ‘ஒருமுறை மட்டுமே வழங்கப்படும்’ நிதியாக மாற்றப்பட்டு, பொதுக் கல்வி நிறுவனங்களைத் தங்கள் சொந்த ஆதாரங்களை நம்பிச் செயல்படும் சுயநிதி அமைப்புகளாக மாறக் கட்டாயப்படுத்துகின்றன. மேலும், மத்திய-மாநில அரசுகளுக்கிடையேயான நிதிப் பகிர்வு 80:20 எனக் குறைக்கப்பட்டு, மாநில அரசுகள் மீது தேவையற்ற நிதி நெருக்கடியைத் திணிப்பதன் மூலம் பொதுக் கல்வி அமைப்பைச் சீரழிக்கும் மறைமுகச் சதி அரங்கேறி வருகிறது.

இதன் நேரடி விளைவாக, உயர்கல்வியில் தனியார் நிறுவனங்களின் வெடிப்புச் சேர்க்கை (Explosive Growth) நிகழ்ந்துள்ளது.

கடந்த 35 ஆண்டுகளில் சுயநிதி தனியார் மருத்துவக் கல்லூரிகள் 960% என்ற அசுர வளர்ச்சியைக் கண்டுள்ளன. இன்று உயர்கல்விச் சேர்க்கையில் தனியார் பங்களிப்பு 30% ஆக உயர்ந்துள்ளது (இதில் 21% பல்கலைக்கழகப் பட்டப் படிப்புகளும், 9% பாலிடெக்னிக் டிப்ளமோக்களும் அடங்கும்).

இத்தகைய வணிகமயமாக்கலின் உச்சகட்டப் வெளிப்பாடே “நீட் தேர்வுத் துரோகம்” (NEET Betrayal) ஆகும். இதன் பின்னணியில் உள்ள ஏழு திடுக்கிடும் உண்மைகள்:

#  57,474 அரசு மருத்துவ இடங்களுக்கு 22 லட்சம் எளிய, நடுத்தரப் பிரிவு மாணவர்கள் போட்டியிடும் சூழலில் ஒவ்வொரு அரசு இடத்திற்கும் 38 மாணவர்கள் போட்டியிடும் நிலை நிலவுகிறது.

# மொத்த மருத்துவ இடங்களில் 55% இடங்கள் மறைமுகமாகப் பணக்காரர்களுக்கு மட்டுமேயானதாக மாற்றப்பட்டுள்ளன. நீட் தேர்வில் தோல்வியடைந்த அல்லது மிகக் குறைந்த மதிப்பெண் பெற்றவர் கூட, ₹ 50 லட்சம் முதல்  ₹3 கோடி வரை கொடுத்து MBBS இடத்தை விலைக்கு வாங்க முடிகிறது.

# அரசு மருத்துவக் கல்லூரிகளின் வளர்ச்சி வெறும் 314% ஆக மட்டுமே இருக்க, சுயநிதி தனியார் மருத்துவ இடங்கள் 960% வளர்ச்சி அடைந்து வணிகச் சுரண்டலை உறுதி செய்துள்ளன.

#  நீட் தேர்வுக்காக இயங்கும் பயிற்சி மையங்கள் (Coaching Industry) ₹58,000 கோடியிலிருந்து ₹1.3 லட்சம் கோடி ஈட்டும் பிரம்மாண்டமான வணிகச் சந்தையாக உருவெடுத்துள்ளன.

#  180 கேள்விகளில் 140 கேள்விகள் கசிந்து தேர்வின் நம்பகத் தன்மை சீரழிந்தபோதும், அதை ரத்து செய்வதற்கான அறிவிப்பை வெளியிட தேசிய தேர்வு முகமை அலட்சியம் காட்டி  20 நாட்கள் வரை தாமதப்படுத்தி, மாணவர்களின் எதிர்காலத்துடன் விளையாடியது.

#  உச்ச நீதிமன்றமும், MHRD-யின் 3 உயர்மட்டக் குழுக்களும் நீட் தேர்வு மாநிலங்களின் உரிமைகளைப் பறிக்கும் அரசியலமைப்புக்கு எதிரான ஒன்று என எச்சரித்தும், அவை அனைத்தும் ஆளும் வர்க்கத்தால் முற்றிலுமாகப் புறக்கணிக்கப்பட்டன.

#  720-க்கு வெறும் 114 மதிப்பெண் (15%) மட்டுமே பெறும் ஒரு பணக்கார மாணவர் பெரும் கட்டணம் தந்து மருத்துவப் படிப்பு கற்கும் தகுதி பெறுகிறார். இது ‘தகுதி’ (Merit) என்ற பெயரில் நடத்தப்படும் மிகப் பெரிய  மோசடியாகும்.

இவ்வாறாக, 1991-க்குப் பிந்தைய தாராளமயமாக்கலும், நீட் போன்ற நுழைவுத் தேர்வுகளும் சமூக நீதியை முழுமையாகச் சிதைத்து, தகுதியுள்ள ஏழை மாணவர்களின் மருத்துவக் கனவை மறுத்து, கல்வியை வணிகப் பண்டமாக மாற்றியுள்ளன.

தேசம் தழுவிய கல்வி இயக்கங்களை கட்டமைத்தல்;

கருத்தரங்கின் அனைத்து அமர்வுகளின் இறுதியிலும் பேரா  தருண் காந்தி நாஸ்கர் (Prof. Tarun Kanti Naskar) அவர்களின் தலைமையில் “நாடு தழுவிய கல்வி இயக்கத்தைக் கட்டியெழுப்புதல்” (Building up of Countrywide Education Movement) எனும் 5-வது அமர்வு நடைபெற்றது.

இவை அனைத்தையும் ஒருங்கிணைத்துத் தொகுத்துரைத்த பேரா தருண் நஸ்கர், பொதுக் கல்வியைப் பாதுகாக்கவும், கல்வியின் ஜனநாயக மற்றும் அறிவியல் பூர்வமான தன்மையை மீட்டெடுக்கவும், அகில இந்தியக் கல்விக் பாதுகாப்புக் குழுவின் (AISEC) இயக்கங்களை நாடு தழுவிய அளவில் மேலும் வலுப்படுத்துவதற்கான எதிர்காலச் செயல்பாடுகள் மற்றும் போராட்டப் பாதைகளுக்கான தெளிவான வழிகாட்டுதலை வழங்கி அமர்வை நிறைவு செய்தார்.

இறுதிக்குறிப்பு :

கருத்தரங்கின் நிறைவு அமர்வாக, திரு. தேபாசிஷ் ராய் (Sri Debashish Roy) அவர்களின் உரை அமைந்தது. அனைத்து அமர்வுகளின் ஒட்டுமொத்தப் புள்ளிகளையும் ஒருங்கிணைத்து உரையாற்றிய அவர், “மக்கள் கல்விக் கொள்கை” (People’s Education Policy 2026) மற்றும் அறிவியல் பூர்வமான, ஜனநாயக ரீதியிலான பொதுக் கல்வியைப் பாதுகாப்பதன் அவசியத்தை வலியுறுத்தினார். லாப நோக்கம் கொண்ட கார்ப்பரேட் மயமாக்கல், வரலாற்றைத் திரிக்கும் போலி அறிவியலின் அச்சுறுத்தல்கள் மற்றும் கல்வி உரிமைகளைப் பறிக்கும் மத்தியமயமாக்கல் கொள்கைகளுக்கு எதிராக நாடு முழுவதிலும் உள்ள மாணவர்கள், ஆசிரியர்கள், ஆய்வாளர்கள் மற்றும் கல்வியாளர்கள் ஒருங்கிணைந்தப் போராட்டப் பாதையில் ஒன்றிணைய வேண்டும் என்ற வலுவான அழைப்புடன் கருத்தரங்கை வெற்றிகரமாக நிறைவு செய்தார்.

1986ஆம் ஆண்டு புதிய தேசியக் கல்விக் கொள்கை அறிமுகமானது. பிறகு 1991இல்  இதற்கு  மறுவடிவம் கொடுக்கப்பட்டது. இது கல்வியை வணிகமாக்க சட்ட ஒப்புதல் தந்தது. அதன் பின் ஏகப்பட்ட கமிட்டிகள் அமைத்து கல்வியின் மீது தொடர்ந்து தாக்குதல்கள் நடைபெற்றன.

இதன் உச்சமாக வந்த 2020 தேசிய கல்விக் கொள்கையின்   மூலம் இந்த தாக்குதல்கள் புதிய பரிமாணம் பெற்றன. அவற்றில் சில NCFFS, NCFSE, NHEQF, ABC, IKS, VBSA, ANRF. என்பவையெல்லாம் கல்வித் துறையில் உலக வரலாற்றில் எந்த தேசத்திலும் நடந்திராத தாக்குதல்களாகும். இந்த ஆவணங்கள் கல்வியியல் தத்துவத்தின் அடித்தளத்தையே அசைக்கும் நஞ்சாகும்.

இவை அனைத்தையும் கருத்தில் கொண்டு அகில இந்திய கல்விப் பாதுகாப்புக் கமிட்டி கொல்கத்தாவில் மூன்று நாட்கள் பயிற்சிபட்டறை நடத்தியது. இதில் கலந்து கொண்ட பிரபல கல்வியாளர்களின் சொற்பொழிவுகளின் சாராம்சத்தை இங்கே தந்துள்ளோம். இதன் முழு வடிவம் பின்னர் புத்தகமாக வெளிவரும்.

பேராசிரியர் யோகராஜன்

அறம் இணைய இதழ்

https://aramonline.in/32714/aiesec-kolkata-conference/

Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு