இடதுசாரிச் சிந்தனை கொண்ட வேட்பாளர்களைத் தகுதிநீக்கம் செய்தல்: உத்தரப் பிரதேச அரசின் கருத்தியல் பாரபட்சமும் ஒழுக்கப் போலித்தனமும்
அருந்ததி துரு - சந்தீப் பாண்டே
அரசுத் துறைகள், பொதுத்துறை நிறுவனங்கள், வாரியங்கள் மற்றும் நகர, உள்ளாட்சி அமைப்புகளில் பணிகளுக்கு விண்ணப்பிக்க விரும்பும் வேட்பாளர்களுக்காக உத்தரப் பிரதேச அரசு புதிய வழிகாட்டுதல் ஒன்றை வெளியிட்டுள்ளது. வன்முறை வழிகளின் மூலம் சமூக அல்லது அரசியல் மாற்றத்தைக் கொண்டுவர முயலும் அமைப்புகளுடன் தொடர்பிலுள்ள எந்தவொரு நபரும் இத்தகைய பணிகளுக்குத் தகுதியற்றவராவார். இந்த வலதுசாரி அரசு, இடதுசாரிக் கருத்தியலைப் பின்பற்றும் நபர்களைத் தெளிவான இலக்காகக் கொண்டு செயல்படுகிறது. பாரதிய ஜனதா கட்சி ஆட்சிக்கு வந்தது முதலே, நக்ஸலைட்களை ஒழிப்பதில் அவர்களுக்கு இருக்கும் தீவிர முனைப்பை நாம் கண்டு வருகிறோம். தற்போது இந்தியா இடதுசாரி தீவிரவாதிகளற்ற நாடாக மாறிவிட்டது என்று பிரதமர் கூறியுள்ளதுடன், குஜராத்தில் நர்மதா நதியின் சர்தார் சரோவர் அணைக்கு அருகில் சீன உதவியுடன் நரேந்திர மோடி அரசால் கட்டப்பட்ட சர்தார் படேலின் உயரமான சிலை அமைந்துள்ள இடத்தில், இந்த ஆண்டும் அக்டோபர் 31 அன்று அவருடைய பிறந்தநாளை முன்னிட்டு இக்கருப்பொருளில் கொண்டாட்டமும் நடத்தப்பட்டது. மேலும், அரசால் கொண்டாடப்பட்ட பிர்சா முண்டாவின் பிறந்தநாளான பழங்குடியினர் பெருமை தினத்திலும் (ஜனஜாதீய கௌரவ் திவாஸ்) இவ்விவகாரம் ஒரு சாதனையாகவே முன்னிறுத்தப்பட்டது. ஆனால், அவர்கள் தங்களது வெற்றியை முழுமையாகக் கொண்டாடுவதற்கு முன்பாகவே, ராஷ்ட்ரீய ஸ்வயம்சேவக் சங்கத்தால் பரப்பப்படும் மத தேசியவாதக் கருத்தியலிலிருந்து மாறுபட்டுச் சிந்தித்து, ஆளும் வர்க்கத்திற்கு அசௌகரியமான கேள்விகளை எழுப்பும் 'திமாகி நக்ஸல்கள்' (DimagiNaxals) என்னும் புதிய தலைமுறையினர், இசட் தலைமுறையினரின் (Gen Z) தலைமையிலான ஒரு இயக்கமாகத் தீவிர எழுச்சி பெற்று உருவாகியுள்ளனர்.
இடதுசாரித் தீவிரவாதிகளின் வன்முறை கண்டிக்கத்தக்கது என்றாலும், வலதுசாரிகளின் வன்முறையை யாராவது எவ்வாறு நியாயப்படுத்த முடியும்? மேலும், வலதுசாரி வன்முறையானது சமூக அல்லது அரசியல் மாற்றத்தைக் கொண்டுவருவதை நோக்கமாகக் கொண்டிருக்கவில்லை என்று நாம் எவ்வாறு கூற இயலும்? மகாத்மா காந்தியின் படுகொலையில் தொடங்கி, அயோத்தியில் உடனடியாக 17 பேரும், அதைத் தொடர்ந்து இந்தியா முழுவதும் முக்கியமாக முஸ்லிம்கள் உள்ளிட்ட 2000 முதல் 3000 பேரும் கொல்லப்பட்ட பரவலான மத வன்முறையைத் தூண்டிய பாபரி மசூதி இடிப்பு வரை பார்க்கும்போது, பாபரி மசூதி இடிப்பே மத்தியில் பாஜக அரசு அமைவதற்கு வழிவகுத்தது என்பது நிரூபிக்கப்பட்ட உண்மையாகும். எனவே, வலதுசாரி இந்து தேசியவாத அரசியல், அதிகாரத்திற்கு வருவதற்காக இந்நாட்டின் அரசியலமைப்பைச் சீர்குலைத்து வன்முறையை வெளிப்படையாகப் பயன்படுத்தியுள்ளது. பாபரி மசூதி இடிக்கப்படுவதற்கு முன்பு, அன்றைய உத்தரப் பிரதேச முதல்வர் கல்யாண் சிங், பாபரி மசூதி எவ்விதப் பாதிப்புமின்றிப் பாதுகாக்கப்படும் என்று உச்ச நீதிமன்றத்தில் உறுதிமொழிப் பத்திர வடிவில் உறுதியளித்திருந்தார். இவ்வாறுதான் வலதுசாரி அரசியல் இந்நாட்டின் அரசியலமைப்பைத் தலைகீழாகக் கவிழ்த்து அதிகாரத்தைக் கைப்பற்றியதுடன், தனது ஆட்சி அதிகாரத்தைத் தக்கவைத்துக்கொள்ளத் தொடர்ந்து அதையே செய்து வருகிறது.
2022-இல் குஜராத்தில் நடந்த மத வன்முறை, மாநில அதிகாரத்தில் நரேந்திர மோடியின் பிடியை இறுக்கியதுடன், அவர் பிரதமர் பதவிக்கான வேட்பாளராக உருவெடுக்கவும் வழிவகுத்தது. அப்பதவிக்குப் போட்டியிட வேறு சிலர் இருந்தபோதிலும், குஜராத்தில் 'முஸ்லிம்களுக்குப் பாடம் கற்பித்தார்' என்ற அவரது தனித்துவமான பங்களிப்பின் காரணமாக, இறுதியில் பாஜக தொண்டர்களால் நரேந்திர மோடியின் பெயரே முழங்கப்பட்டது. இறுதியில், குஜராத் வன்முறையை மேற்பார்வையிட்டதில் அவரது பங்கே, பாஜகவின் பிரதமர் வேட்பாளரைத் தீர்மானிக்கும் நேரத்தில் அவருக்கு சாதகமாக அமைந்தது.
வன்முறை என்பது வலதுசாரி அரசியலின் ஒரு முக்கிய அங்கமாகும். பாஜக தனது ஆதரவாளர்களை ஒன்று திரட்டுவதற்கு வன்முறையை வெற்றிகரமாகப் பயன்படுத்தியுள்ளது. 1998-இல் அணுஆயுதச் சோதனைகளை நடத்தியபோது, அடல் பிகாரி வாஜ்பாய் இந்தியாவின் ராணுவ பலத்தைக் காட்டினார். 1974-இல் இந்திரா காந்தி அணுஆயுதச் சோதனைகளை நடத்தியபோது, அது ஆயுதங்களை உருவாக்குவதற்காக என்று அவர் உரிமை கோரவில்லை. ஆனால் பாஜக அணுகுண்டைப் பற்றி பெருமிதத்துடன் தம்பட்டம் அடித்தது. இதன் விளைவாக, ஒரு மாதம் முடிவதற்கு முன்பே பாகிஸ்தான் தனது ஆயுதங்களைச் சோதனை செய்து, இந்தியாவுடன் அணுஆயுதச் சமநிலையை எட்டியது; இது பாரம்பரிய ராணுவ மேலாதிக்கத்தில் இந்தியாவிற்கு இருந்த நன்மையைப் பறித்தது. இருப்பினும், பாஜக அணுஆயுதங்களை இந்தியாவின் தாக்குதல் திறனின் அதிகரிப்பாகச் சித்தரித்து, தனது ஆதரவாளர்களைத் திரட்டுவதற்குப் பயன்படுத்திக் கொண்டது.
பசுவதைக் குற்றம் சுமத்தி, மாடுகளை ஏற்றிச் செல்பவர்களை—குறிப்பாக முஸ்லிம்களை—கும்பலாக அடித்துக் கொல்வதாகட்டும், சிறுபான்மையினர் வாழும் பகுதிகள் வழியாக மத ஊர்வலங்களை நடத்தி, தூண்டக்கூடிய முழக்கங்களை எழுப்பி, சில சமயங்களில் வன்முறை மோதல்களுக்கும் உயிரிழப்புகளுக்கும் வழிவகுப்பதாகட்டும், மாற்றுக்கருத்துடைய அறிவுஜீவிகளைப் பட்டப்பகலில் சுட்டுக்கொல்வதாகட்டும், இந்துத்துவக் கருத்தியலானது சமுதாயத்தைத் துருவப்படுத்தித் தனது வாக்கு வங்கியை உறுதிப்படுத்திக் கொள்ள தொடர்ச்சியாக வன்முறையையே பயன்படுத்தியுள்ளது. தேர்தல்கள் நெருங்க நெருங்க, இதுபோன்ற வன்முறைச் சம்பவங்களின் எண்ணிக்கையும் தீவிரமும் அதிகரிக்கின்றன.
பாஜக அரசுகள் அதிகாரத்தில் இருக்கும் இடங்களிலெல்லாம், தங்களது அரசியல் எதிரிகளைக் குறிவைக்க உயிரிழப்பை ஏற்படுத்தும் என்கவுன்ட்டர்களையும், ஊனத்தை ஏற்படுத்தும் 'அரை-என்கவுன்ட்டர்களையும்' (half-encounters) பயன்படுத்தியுள்ளன. உத்தரப் பிரதேச அரசு இக்கோட்பாட்டிற்காக புல்டோசர்களையும் வெற்றிகரமாகப் பயன்படுத்தியது; இதைப் பின்பு சில பாஜக ஆளும் மாநிலங்களும் பின்பற்றின. உத்தரப் பிரதேச முதல்வர், நீதித்துறையின் அதிகாரத்தையும் வெளிப்படையாகத் தன் கையில் எடுத்துக்கொண்டு, அரசியல் எதிரிகளுக்குக் கொலை மிரட்டல்களை விடுத்துள்ளார்.
எனவே, சமூக அல்லது அரசியல் மாற்றத்தைக் கொண்டுவர வன்முறையைப் பயன்படுத்துவது அரசுப் பணிகளுக்கு விண்ணப்பிப்போருக்கான தகுதிநீக்க அளவுகோல் என்றால், பாஜகவிற்கு ஆதரவாக வாக்குகளைத் துருவப்படுத்த உதவும் வலதுசாரி இந்துத்துவ ஆர்வலர்களுக்கும் இந்த அளவுகோல் கச்சிதமாகப் பொருந்தும். உண்மையில், இந்த வாதத்தை அரசியல் களத்திற்கு மேலும் நீட்டித்தால், பாஜகவின் உறுப்பினர்களோ அல்லது அதன் சார்பு அமைப்புகளின் உறுப்பினர்களோ வெளிப்படையான வன்முறையை ஆதரிப்பதாலும் அதை நடைமுறைப்படுத்துவதாலும், நாடாளுமன்ற ஜனநாயகத்தில் பங்கேற்பதற்கு பாஜகவே தகுதியற்றது என்று அறிவிக்கப்பட வேண்டும்.
இந்திய அரசியலமைப்பை அவமதிக்கும், சிறுபான்மையினருக்கும் எதிரிகளுக்கும் எதிரான வன்முறையை வெளிப்படையாக ஆதரிக்கும், உலகளவில் மிகவும் போற்றப்படும் இந்திய ஆளுமையான மகாத்மா காந்தியின் படுகொலையை நியாயப்படுத்தும், அதிகாரத்திற்கு வர தேர்தல்களை முறைகேடு செய்யும் ஆனால் ஜனநாயகத்தின் மீது எவ்வித மதிப்பும் இல்லாத, நவீன இந்திய அரசின் அடித்தளமாக விளங்கும் மதச்சார்பின்மை, சமதர்மம், அறிவியல், சுதந்திரம், சமத்துவம், நீதி, சகோதரத்துவம் மற்றும் மனித உரிமைகள் போன்ற கோட்பாடுகளைக் கேலி செய்யும் ஒரு கருத்தியலை நம்பும் மக்கள் கூட்டம், இந்தியாவில் அதிகாரத்திற்கான ஒரே சட்டப்பூர்வ உரிமையாளராகத் தன்னைத் தானே திட்டமிட்டு முன்னிறுத்திக் கொண்டு, மற்ற எல்லாரையும் 'தேசவிரோதிகள்' என நடத்துவது பேரதிர்ச்சியளிக்கிறது.
இந்திய ஜனநாயகம் இந்த போலியான அச்சுறுத்தலின் செல்லுபடித்தன்மையை நீக்கி, இந்திய சுதந்திர இயக்கத்தைக் குறித்ததும், இந்நாட்டின் அரசியலமைப்பில் பொறிக்கப்பட்டிருப்பதுமான உறுதியான கொள்கைகளின் அடிப்படையில் அரசியலை மீண்டும் கொண்டுவரும் கூறுகளை மீட்பதற்கான சரியான தருணம் இதுவேயாகும்.
- அருந்ததி துரு - சந்தீப் பாண்டே
Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு