உலக வங்கி கடன்கள்: வளர்ச்சியா? மறைமுகத் தாக்குதலா?

உலக வங்கி, ஐ.எம்.எப் போன்றவை பல்லாயிரம் கோடிகள் கடன்களை தருகின்றன. அவை என்னென்ன நிபந்தனைகளை விதிக்கின்றன? எந்தெந்த திட்டங்களுக்கு தரப்பட்டு என்னென்ன விளைவுகள் உருவாகியுள்ளன..? என பார்த்தால் அதிர்ச்சியே !  இதனால் இரு வர்க்கங்களுக்கான இடைவெளி அதிகரித்துள்ளதோடு, இந்தக் கடன்கள் நம் கழுத்தை நெறிக்கின்றன;

உலகளாவிய வளர்ச்சி, வறுமை ஒழிப்பு மற்றும் அடிப்படை வசதிகள் மேம்பாடு ஆகிய நோக்கங்களுடன் செயல்படும் World Bank பல்வேறு நாடுகளில் ஆயிரக்கணக்கான திட்டங்களுக்கு நிதி வழங்கியுள்ளது. ஆனால் அதன் கொள்கைகள் மற்றும் கடன் வழங்கும் முறைமைகள் சமூக நீதி, சுற்றுச்சூழல் பாதுகாப்பு மற்றும் புறக்கணிக்கப்பட்ட சமூகங்களின் வாழ்வாதாரம் ஆகியவற்றில் கடுமையான தாக்கங்களை ஏற்படுத்தியதாக உலகம் முழுவதும் விமர்சனங்கள் எழுந்துள்ளன.

பெண்கள், பழங்குடியினர் மற்றும் கடற்கரை வாழ் சமூகங்கள் உள்ளிட்ட பல தரப்பினரும் உலக வங்கியின் முதலீடுகள் மற்றும் கொள்கைகளுக்கு எதிராக போராடி, அதன் பொறுப்புணர்வை கேள்விக்குள்ளாக்கியுள்ளனர். இந்தியாவில் இரண்டு முக்கியமான மக்கள் இயக்கங்கள் இந்த விவாதத்தை உலக அளவில் முன்னிலைப்படுத்தின.

நர்மதா பச்சாவ் இயக்கம் – ஒரு நதியின் குரல்

1980களில் தொடங்கிய Narmada Bachao Andolan, மேற்கு இந்தியாவில் நர்மதா ஆற்றில் அமைக்கப்பட்ட Sardar Sarovar Dam திட்டத்திற்கு எதிரான மிகப்பெரிய மக்கள் இயக்கமாகும். இந்த அணைக்கட்டிற்கு உலக வங்கி சுமார் 450 மில்லியன் டாலர் கடன் வழங்கியது.

இந்த இயக்கம் ஆயிரக்கணக்கான குடும்பங்களின் இடம்பெயர்வு, விவசாய நில இழப்பு, சுற்றுச்சூழல் பாதிப்பு மற்றும் பண்பாட்டு அழிவை வெளிச்சமிட்டுக் காட்டியது. நதியுடன் ஆழமான ஆன்மீக மற்றும் வாழ்வாதார உறவை கொண்ட பழங்குடியினர், அணைக்கட்டு நதியின் இயற்கை ஓட்டத்தை “மூச்சுத்திணறச் செய்கிறது” என்று விவரித்தனர்.

சமூக மற்றும் சுற்றுச்சூழல் தாக்கங்கள் முழுமையாக மதிப்பிடப்படாமல் உலக வங்கி ஒப்பந்தத்தில் ஈடுபட்டதாக இயக்கம் குற்றம் சாட்டியது. மக்கள் எதிர்ப்புகள், உண்ணாவிரதங்கள் மற்றும் சர்வதேச அழுத்தங்கள் காரணமாக, 1993ஆம் ஆண்டு இந்திய அரசு உலக வங்கியின் கடனை ரத்து செய்தது. இருப்பினும், திட்டம் பின்னர் தேசிய பெருமையின் சின்னமாக மாற்றப்பட்டு நிறைவேற்றப்பட்டது.

இடம்பெயர்ந்த மக்களின் முழுமையான மறுவாழ்வு, பாசன வாக்குறுதிகள் மற்றும் சுற்றுச்சூழல் நிவாரணங்கள் இன்னும் முழுமையடையவில்லை என்ற குற்றச்சாட்டுகள் தொடர்ந்து எழுகின்றன.

முந்த்ரா மின்நிலையம் – கடற்கரை சமூகங்களின் போராட்டம்

2008ஆம் ஆண்டு உலக வங்கியின் தனியார் துறை பிரிவு International Finance Corporation, குஜராத்தில் அமைந்துள்ள Coastal Gujarat Power Limited (டாடா முந்த்ரா) நிலக்கரி மின்நிலையத்திற்கு நிதி வழங்கியது.

இந்த திட்டத்தால் கடலுக்குள் வெளிவிடப்பட்ட சூடான நீர் மீன் வளங்களை பாதித்து, கடல் வாழ் உயிரினங்களின் பேரிழப்பில் முடிந்தது. 75 ஹேக்டேரில் மாங்குரோவ் காடுகளை இது அழித்தது. சுற்றுச் சூழல் ஏற்படுத்திய பாதிப்புகள் சுற்றுவட்டார மக்களை நோய்களில் தள்ளியது. மணல் மேடுகள் அழிக்கப்பட்டன, கடல் நீர் நிலத்திற்குள் புகுந்ததால் விவசாய நிலங்கள் உப்புத்தன்மை அடைந்தன. குடி தண்ணீர் உப்பானது. மீனவர்கள் மற்றும் விவசாயிகள் Machimar Adhikar Sangharsh Sangathan என்ற அமைப்பின் கீழ் ஒன்றிணைந்து எதிர்ப்பு தெரிவித்து போராடினர்.

2013ஆம் ஆண்டு உலக வங்கியின் கண்காணிப்பு அமைப்பு திட்டம் அதன் சொந்த சுற்றுச்சூழல் மற்றும் சமூக கொள்கைகளை மீறியதாக உறுதிப்படுத்தியது. தொடர்ந்து 2015இல் அமெரிக்காவில் வழக்கு தொடரப்பட்டபோது, உலக வங்கி குழுமம் முழுமையான சட்ட பாதுகாப்பு பெற முடியாது என்ற வரலாற்றுச் தீர்ப்பு வெளிவந்தது. இது உலகளாவிய பொறுப்புணர்வுக்கான முக்கிய முன்னேற்றமாக பார்க்கப்படுகிறது.

கடன் கொள்கைகள் மற்றும் மறைமுக நிபந்தனைகள்

கடந்த 80 ஆண்டுகளில் உலக வங்கி நூற்றுக்கணக்கான நாடுகளில் ஆயிரக்கணக்கான திட்டங்களுக்கு நிதி வழங்கியுள்ளது. இந்த நிதி உதவிகள் பல சமயங்களில் தனியார்மயமாக்கல், அரசுச் சேவைகள் குறைப்பு மற்றும் பொருளாதார மறுசீரமைப்பு போன்ற நிபந்தனைகளுடன் இணைக்கப்பட்டிருந்ததாக விமர்சகர்கள் கூறுகின்றனர்.

1991ஆம் ஆண்டு இந்தியா International Monetary Fund மற்றும் உலக வங்கியிடமிருந்து கடன் பெற்றபோது செயல்படுத்தப்பட்ட கட்டமைப்பு சீரமைப்பு திட்டங்கள், வங்கிகள் லாப நோக்கில் இயங்க வேண்டும், முன்னுரிமைத் துறைகளுக்கான கடன் குறைக்கப்பட வேண்டும் என்ற கொள்கைகளை வலியுறுத்தின.

இதற்கு முன் 1969 தேசியமயமாக்கலுக்குப் பிறகு, கிராமப்புற கடன் வசதி, சிறு தொழில் வளர்ச்சி, வேலைவாய்ப்பு மற்றும் வருமான சமநிலை ஆகியவை மேம்பட்டிருந்தன. ஆனால் புதிய பொருளாதார கொள்கைகள் சமூக நோக்கத்திலிருந்து சந்தை நோக்கத்திற்கு மாறியது என்ற விமர்சனங்கள் எழுகின்றன. ஆக, சமூக நோக்கங்கள் என்ற பெயரில் சந்தை  லாப நோக்கங்களே கடன்களின் பின்னணியில் உள்ளன.

வளர்ச்சி vs மனித உரிமைகள் – எதிர்காலப் பாதை

உலக வங்கி திட்டங்கள் அடிப்படை வசதிகள், மின்சாரம், போக்குவரத்து மற்றும் வறுமை குறைப்பு போன்ற துறைகளில் முக்கிய பங்களிப்பு செய்துள்ளன என்பது மறுக்க முடியாதது. ஆனால் அதே நேரத்தில், அந்தக் கடன்களால் மக்கள் இடம்பெயர்வு, சுற்றுச்சூழல் சேதம், கடன் சுமை மற்றும் சமூக சமத்துவக் குறைவு போன்ற பிரச்சினைகள் அதன் வளர்ச்சி மாதிரியை கேள்விக்குள்ளாக்குகின்றன.

நர்மதா மற்றும் முந்த்ரா போன்ற போராட்டங்கள், வளர்ச்சி திட்டங்கள் மக்களை மையமபடுத்தியும் சுற்றுச்சூழல் பொறுப்பு சொல்வதாகவும் அமைந்திருக்க வேண்டும் என்பதைக் குறிப்பிடுகின்றன. வெளிப்படைத் தன்மை, சமூக ஆலோசனை மற்றும் பொறுப்புணர்வு இல்லாமல் எந்த வளர்ச்சியும் நீடித்ததாக இருக்க முடியாது என்பதே இவ்வியக்கங்கள் வழங்கும் முக்கியப் பாடமாகும்.

அனைவருக்கும் வளம்” என்ற உயரிய இலட்சியத்துடன் உருவான சர்வதேச நிதி நிறுவனங்கள் — குறிப்பாக World Bank மற்றும் International Monetary Fund — கடந்த எட்டு தசாப்தங்களில் உலக பொருளாதாரத்தின் பாதையை வடிவமைத்துள்ளன. ஆனால் வளர்ச்சி, வறுமை ஒழிப்பு மற்றும் முன்னேற்றம் என்ற பெயரில் முன்னெடுக்கப்பட்ட கொள்கைகள் பல நாடுகளில் சமத்துவக் குறைவு, சமூக இடம்பெயர்வு மற்றும் சுற்றுச்சூழல் பாதிப்புகளை உருவாக்கியதாக கடுமையான விமர்சனங்கள் எழுகின்றன.

நரசிம்மம் குழு மற்றும் வங்கி மாற்றங்கள்

1990களில் இந்திய வங்கி துறையில் முக்கிய மாற்றங்களை ஏற்படுத்திய Narasimham Committee, வங்கிகள் சமூக சேவையை விட லாப நோக்குடன் செயல்பட வேண்டும் என்று பரிந்துரைத்தது. இதன் விளைவாக சிறு கடன்கள் குறைந்து, பெரிய நிறுவனங்களுக்கு அதிகளவு கடன் வழங்கும் நடைமுறை உருவானது.

1991இல் சிறு அளவிலான கடன்கள் மொத்த கடன்களில் பெரும் பகுதியை கொண்டிருந்தாலும், இன்று அந்த விகிதம் கணிசமாக குறைந்துள்ளது. முன்னுரிமைத் துறைகளுக்கான கடன் தளர்த்தப்பட்டதால், சிறு தொழில்கள், சுய உதவி குழுக்கள் மற்றும் விவசாயிகள் கடன் பெறுவதில் சிரமம் ஏற்பட்டது.

மாறாக, பெரிய நிறுவனங்கள் குறைந்த வட்டி விகிதத்தில் ஆயிரக்கணக்கான கோடி ரூபாய் கடன்களை பெற்றன. கல்விக் கடன், சிறு தொழில் கடன் போன்றவை அதிக வட்டி விகிதத்தில் வழங்கப்படுவது சமூக சமநிலையை பாதிப்பதாக விமர்சிக்கப்படுகிறது.

உலகமயமாக்கல் மற்றும் சமத்துவக் குறைவு

கடந்த மூன்று தசாப்தங்களில் உலகமயமாக்கல் மற்றும் தொழில்நுட்ப முன்னேற்றம் கோடிக்கணக்கான மக்களை வறுமையின் பிடியிலிருந்து உயர்த்தியுள்ளன. அதே நேரத்தில், பெரும்பாலான நாடுகளில் மேல் தட்டுக்கும், அடித்தட்டுக்குமான இடைவெளி அதிகரித்து சமத்துவக் குறைவு அதிகரித்துள்ளது.

சர்வதேச நிதி நிறுவனங்கள் சமத்துவக் குறைவை குறைப்பது குறித்து பேசினாலும், அவற்றின் கட்டமைப்பு சீரமைப்பு கொள்கைகள் பொதுச் செலவுகளை குறைத்து, சுகாதாரம் மற்றும் கல்வி போன்ற அடிப்படை உரிமைகளை பலவீனப்படுத்தியதே உண்மை என விமர்சகர்கள் கூறுகின்றனர்.

வறுமையும், வளமையும் ஒங்கி வளர்ந்துள்ளன.

இந்தியாவில் தனியார் மருத்துவ ஆதிக்கத்தின் வளர்ச்சி காரணமாக, மக்கள் மருத்துவச் செலவுகளால் வறுமைக் கோட்டிற்கு கீழ் தள்ளப்படுகின்றனர். இது சமூக பாதுகாப்பு அம்சங்கள் குறைந்ததன் விளைவாக பார்க்கப்படுகிறது.

அறிவியல் வங்கி – ஒரே மாதிரி வளர்ச்சி மாதிரி

உலக வங்கி தன்னை “அறிவியல் வங்கி” எனக் குறிப்பிடுகிறது. ஆனால் அதன் ஆராய்ச்சிகள் மற்றும் கொள்கை பரிந்துரைகள் பல சமயங்களில் ஒரே மாதிரி வளர்ச்சி மாதிரியை — தனியார் மயமாக்கல், அரசின் கட்டுப்பாடு தளர்த்தல் மற்றும் சந்தை சார்ந்த சீர்திருத்தங்கள் — முன்னெடுத்ததாக குற்றச்சாட்டுகள் உள்ளன.

இந்த அறிவு உருவாக்கத்தில் உள்ளூர் சமூகங்களின் அனுபவங்கள் மற்றும் குரல்கள் பெரும்பாலும் புறக்கணிக்கப்பட்டதாக விமர்சிக்கப்படுகிறது. பெரிய அணைகள் போன்ற திட்டங்களின் பயன்களை வலியுறுத்திய ஆய்வுகள் வெளிப்படைத் தன்மை இல்லாமல் பயன்படுத்தப்பட்டதாகவும் கூறப்படுகிறது.

அரசியல் தாக்கங்கள் மற்றும் அதிகார ஆட்சி ஆதரவு

உலக வங்கி மற்றும் IMF தங்களை அரசியல் சார்பற்றவை என கூறினாலும், பல காலங்களில் சர்வாதிகார ஆட்சிகளை ஆதரித்ததாக வரலாற்று விமர்சனங்கள் உள்ளன. பனிப்போர் காலத்தில் சில நாடுகளில் மனித உரிமை மீறல்கள் நடந்த போதும் நிதி ஆதரவு தொடர்ந்தது என்ற குற்றச்சாட்டுகள் முன்வைக்கப்படுகின்றன.

பெரிய கட்டமைப்பு திட்டங்கள் காரணமாக வாழ்வாதாரம் இழந்த சமூகங்கள் எதிர்ப்பு தெரிவித்த போது, அரசுகள் கடுமையான நடவடிக்கைகளை எடுத்ததையும் விமர்சகர்கள் சுட்டிக்காட்டுகின்றனர்.

காலநிலை மாற்றம் மற்றும் வளர்ச்சி மாதிரி

காலநிலை மாற்றத்துக்கு எதிராக இந்த நிறுவனங்கள் கடந்த காலத்தில் நிலக்கரி, எண்ணெய் மற்றும் பெரிய அணைகள் போன்ற திட்டங்களுக்கு நிதி வழங்கியுள்ளன. அதிகளவு வளப் பயன்பாடு மற்றும் “எல்லையற்ற வளர்ச்சி” என்ற கொள்கை இன்று உலகம் எதிர்கொள்ளும் காலநிலை நெருக்கடியை தீவிரப்படுத்தியதாக பல ஆய்வுகள் கூறுகின்றன.

புதுப்பிக்கத்தக்க ஆற்றல் மாற்றத்திற்கு பதிலாக, கார்பன் அதிகமாக உமிழும் ஆற்றல் திட்டங்கள் முன்னுரிமை பெற்றன என்பது முக்கிய குற்றச்சாட்டாக உள்ளது.

டிஜிட்டல் கண்காணிப்பு மற்றும் நலத் திட்டங்கள்

டிஜிட்டல் அடையாள திட்டங்கள் மற்றும் தரவு அடிப்படையிலான நலத் திட்டங்கள் திறன் மற்றும் வெளிப்படைத் தன்மையை உயர்த்தும் என்றாலும், தொழில்நுட்ப பிழைகள் காரணமாக பலர் அடிப்படை சேவைகளில் இருந்து விலக்கப்படுகின்றனர் என்ற கவலைகள் எழுகின்றன. நலத் திட்டங்களில் சலுகைகள் குறைப்பும், கண்காணிப்பு அதிகரிப்பும் சமூக பாதுகாப்பை பாதிக்கும் அபாயத்தை உருவாக்குகின்றன.

“அனைவருக்கும் வளம்” என்ற வாக்குறுதி இன்னும் முழுமையாக நனவாகவில்லை. வளர்ச்சி திட்டங்கள் சிலருக்கு வாய்ப்புகளை உருவாக்கினாலும், பலருக்கு வாழ்வாதார இழப்பு, கடன் சுமை மற்றும் சமத்துவக் குறைவு போன்ற சவால்களை ஏற்படுத்தியுள்ளன.

எதிர்கால வளர்ச்சி மக்கள் மையமாகவும், சுற்றுச்சூழல் பொறுப்புடன் அமைந்ததாகவும் இருக்க வேண்டியது அவசியம். வெளிப்படைத்தன்மை, உள்ளூர் சமூகங்களின் பங்கு மற்றும் மனித உரிமை பாதுகாப்பு ஆகியவை இல்லாமல் எந்த வளர்ச்சியும் நிலையானதாக இருக்க முடியாது.

மக்கள் இயக்கங்கள் மற்றும் சமூகப் போராட்டங்கள் காட்டுவது ஒரே உண்மை — வளர்ச்சி என்பது எண்ணிக்கைகளின் வெற்றி அல்ல; மனிதர்களின் நலனே அதன் உண்மையான அளவுகோல்.

முடிவாக, வளர்ச்சி என்ற பெயரில் மனித வாழ்வாதாரம் மற்றும் இயற்கை வளங்கள் பாதிக்கப்படாமல் இருப்பதை உறுதி செய்வது அரசுகளும் சர்வதேச நிதி நிறுவனங்களும் ஏற்க வேண்டிய முக்கிய பொறுப்பாகும். மக்கள் குரலை கேட்கும் வளர்ச்சி மட்டுமே உண்மையான முன்னேற்றமாக கருதப்படும்.

(மறுபக்கம் என்கின்ற அமைப்பு ஏற்பாடு செய்திருந்த  14வது சென்னை சர்வதேச ஆவண படங்கள் மற்றும் குறும்படங்கள் திரை விழா 2026  சென்னை கோட்டூர்புரத்தில் செயல்பட்டு வரும் சென்னை இதழியல் கல்வி நிறுவனத்தில் நடைபெற்று வருகிறது .25.02.2026 அன்று  திரையிடப்பட்ட “The Balance sheet: World Bank &its 80 Year Legacy” என்கின்ற 70 நிமிட ஆவண படத்தில் அலசபட்ட கருத்துக்களின் சாராம்சம். இந்த ஆவண படத்தை இயக்கியவர் ஜோ அதியலி.)

(வசந்த் பாரதி)

அறம் இணைய இதழ்

https://aramonline.in/24094/world-bank-loan-is-good-or-bad/

Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு