ஓஸ்லோ உடன்படிக்கை: இறந்தே பிறந்த குழந்தை

Disclaimer: செந்தளம் வலைதள அரசியல் நிலைப்பாட்டில் இருந்து விமர்சனத்துடன் வாசிக்குமாறு கோருகிறோம்

2018 செப்டம்பர் 13 அன்றோடு, இஸ்ரேலுக்கும் பாலஸ்தீனத்துக்கும் இடையே "வரலாற்றுச் முக்கியத்துவம் பெற்ற" ஒஸ்லோ அமைதி ஒப்பந்தம் கையெழுத்திடப்பட்டு 25ஆண்டு நிறைவடைந்தது. ஒஸ்லோ II என்ற துணை ஒப்பந்தம் 1995 இல் மேற்குக் கரையை மூன்று பகுதிகளாகப் பிரித்து கையெழுத்தானது. 1993 ஆம் ஆண்டு வாஷிங்டனில் உள்ள வெள்ளை மாளிகையில் ஒஸ்லோ ஒப்பந்தத்தில் கையெழுத்திடும் விழா நடைபெற்றது. முதன்முறையாக, இஸ்ரேலிய பிரதமர் யிட்சாக் ராபின் மற்றும் பாலஸ்தீன தலைவர் யாசர் அராபத் ஆகியோர் அமெரிக்க ஜனாதிபதி பில் கிளிண்டனின் முன்னிலையில் கைகுலுக்கினர். இஸ்ரேலியர் மற்றும் பாலஸ்தீனிய தலைவர் ஒருவரின் முதல் பொது கைகுலுக்கல் இதுவாகும். இஸ்ரேலுக்கும் பாலஸ்தீன விடுதலை அமைப்புக்கும் (பிஎல்ஓ) இடையே இரகசிய பேச்சுவார்த்தைகள் அமெரிக்க மேற்பார்வையின் கீழ் நோர்வே தலைநகர் ஒஸ்லோவில் நடந்தது. அதனால் அப்பெயரால் இந்த ஒப்பந்தங்கள் அழைக்கப்பட்டன. 1979 ஆம் ஆண்டு முதலே நார்வே அரசாங்க அலுவலகங்களைப் பயன்படுத்தி இஸ்ரேலியர்களுடன் பேச்சுவார்த்தை நடத்துவதற்கு அராபத் முயன்றார், ஆனால் அவற்றை இஸ்ரேலிய அரசாங்கங்களால் நிராகரித்தன. 1987 இல் இஸ்ரேலிய ஆக்கிரமிப்பிற்கு எதிரான பாலஸ்தீனிய "இன்டிபாடா" (பெரும் எழுச்சி) வெடித்த பிறகுதான், இஸ்ரேலிய அரசாங்க வட்டாரங்களில் இந்த பிரச்சினையில் மறுபரிசீலனை செய்யப்பட்டது.

அரபாத்தின் செயல்தந்திரப் பிழை

அரபாத் மற்றும் பிஎல்ஓ ஐக்கிய நாடுகளின் தீர்மானங்கள் 242 மற்றும் 338ஐ ஏற்றுக்கொண்டது, இது 1967 அரபு-இஸ்ரேல் போருக்கு முன்பு இருந்த எல்லைகளை விலக்கிக் கொண்டால் இஸ்ரேலை ஒரு நாடாக அங்கீகரிப்பதாக தெரிவித்தது. தீர்மானங்கள் இஸ்ரேல் மேற்குக் கரையில் ஆக்கிரமித்திருந்த "யுத்ததந்திர ரீதியிலான முகாம்கள்" என அழைக்கப்படும் சிலவற்றை தற்காலிகமாக வைத்திருக்கவும் அனுமதித்தன. ஒஸ்லோவில் இரகசியப் பேச்சுவார்த்தைகள் தீவிரமடைந்த நேரத்தில், அராஃபத் சில முக்கிய வளைகுடா அரசுகள் உட்பட அப்பிராந்தியத்தில் உள்ள தனது கூட்டாளிகள் பலரிடமிருந்தும் கூட தனிமைப்படுத்தப்பட்டார். முதல் வளைகுடாப் போரில், அராபத் மற்றும் பாலஸ்தீனியர்கள், பொதுவாகவே, ஈராக்கின் அமெரிக்காவிற்கு எதிரான நிலைபாடு காரணமாக அதன் மீது அனுதாபம் கொண்டிருந்தனர், குவைத் உட்பட வளைகுடா அரசுகள், பாலஸ்தீனத்திற்கு மிகப்பெரிய நிதி ஆதரவாளர்களாக இருந்தனர். பாலஸ்தீனியப் போராட்டத்தின் மிகப் பெரிய ஆதரவாளர்களில் ஒன்றான சோவியத் யூனியனும் சரிந்தது. எகிப்தும் ஜோர்டானும் இஸ்ரேலுடன் தனித்தனியாக சமாதான ஒப்பந்தங்களைச் செய்து கொண்டன. இதன் காரணமாக இஸ்ரேல் பேச்சுவார்த்தையை இம்முறையும் நிராகரிப்பதை தவிர்க்க பிஎல்ஓவின் பல உடனடி கோரிக்கைகளை (ஜெருசலேமின் உணர்வுப்பூர்வமான பிரச்சினைகள், மில்லியன் கணக்கான பாலஸ்தீனியர்களை மேற்கு கரையில் மீள்குடியேற்றம் செய்தல்) கைவிட்டு ஒரு சந்தர்ப்பவாத ஒப்பந்தத்தின் மூலம் ஒஸ்லோவில் கையெழுத்திட்டு அராஃபத் மாபெரும் தவறு செய்தார். 

ஒஸ்லோ உடன்படிக்கையின் கீழ், இஸ்ரேலை பிஎல்ஓ அங்கீகரித்ததற்கு பதிலீடாக பிஎல்ஓ வின் ஆட்சி பகுதியை இஸ்ரேல் அங்கீகரித்தது. அதுவரை, பாலஸ்தீனியர்களின் தாயகத்தில் கட்டப்பட்ட யூத அரசின் சட்டபூர்வமான தன்மையை பிஎல்ஓ அங்கீகரிக்கவில்லை. இஸ்ரேல் PLO ஐ ஒரு பயங்கரவாத அமைப்பாக தடை செய்ததுடன் அதனுடன் எந்த தொடர்பும் வைத்துக் கொள்ள மறுத்தது. ஒப்பந்தத்திற்குப் பிறகு, உலகத் தலைவர்கள் “இது நீண்டகாலமாக அவதிப்படும் பாலஸ்தீனிய மக்களுக்கு அவர்களின் சொந்த அரசை அனுமதிக்கும் ஒரு முக்கிய ஒப்பந்தம்” என்று விரைந்து பாராட்டு அளித்தனர். ராபின் மற்றும் அராபத் ஆகியோர் கதாநாயகர்களாகக் கருதப்பட்டனர், அத்துடன் மற்றொரு இஸ்ரேலிய தலைவரான ஷிமோன் பெரஸுடன் சேர்த்து இவர்களுக்கும் அமைதிக்கான நோபல் பரிசும் வழங்கப்பட்டது.

உடன்படிக்கையின் உள்ளார்ந்த நோக்கங்களை அவிழ்த்தல்

அமெரிக்க தரகு ஒப்பந்தத்தில் கையெழுத்திடும் போது பாலஸ்தீனியர்கள் பல கோரிக்கைகளை இழந்துள்ளனர். மேற்குக் கரை ஏற்கனவே சட்டவிரோத இஸ்ரேலிய குடியேற்றங்களால் ஆக்கிரமிக்கப்பட்ட அதே நேரத்தில் காசா திறந்தவெளி சிறைச்சாலையாக மாற்றப்பட்டிருந்தது. "அமைதிக்கான நிலம்" என்ற வெளித்தோற்ற கருத்தாக்கத்தின் கீழ், ஓஸ்லோ ஒப்பந்தங்கள் கையெழுத்தானது. சில வருடங்களில் அதன் மாயை வெளிபட்டது. இந்த உடன்படிக்கைகள் மேற்குக்கரை நகரமான ரமல்லாவில் தலைமையகமாக கொண்ட இடைக்கால பாலஸ்தீனிய அதிகார சபை (P.A.) உருவாக்க வழிவகுத்தது. 1999 ஆம் ஆண்டுக்குள் ஒரு விரிவான - முழு அளவிலான பாலஸ்தீனிய அரசை உருவாக்குவதே ஒப்பந்தங்களின் இலக்கு என்று கூறப்பட்டது. ஆனால், சமாதான உடன்படிக்கையில் கையெழுத்திட்ட முதல் நாளிலிருந்தே இஸ்ரேல் அதற்கு குழிபறிக்க தொடங்கிவிட்டது. அமைதிப்புறா ராபின், 1995ல் ஜியோனிச இனவெறிக் குழுவால் படுகொலை செய்யப்பட்டார். 2004ல் அராஃபத் இஸ்ரேலியர்களால் ரமல்லாவில் உள்ள அவரது குடியிருப்புக்குள் அடைத்து வைக்கப்பட்டு மர்மமான முறையில் இறந்தார். அவரது தலைமையகத்தையும் இஸ்ரேலிய ராணுவம் குண்டுவீசி சுற்றி வளைத்தது.

1994ல் மேற்குக் கரையில் ஹெப்ரோனில் 29 பாலஸ்தீனியர்களை யூத தீவிரவாதிகள் படுகொலை செய்த பின்னர் ஒஸ்லோ உடன்படிக்கையின் மாயை நொறுங்கத் தொடங்கியது என்று பலர் நம்புகிறார்கள். பெஞ்சமின் நெதன்யாகு, ராபினுக்கும் தொழிலாளர் கட்சிக்கும் எதிரான ஜியோனிச வலதுசாரி இளம் லிகுட் கட்சியின் முக்கிய தலைவர்களில் ஒருவர். நெதன்யாகு 2001 ஆம் ஆண்டில் ஓஸ்லோ உடன்படிக்கையை வீசியெறிந்ததில் அவர் ஒருவரே பொறுப்பு என்று பெருமை பேசும் டேப்பில் சிக்கினார். ஒப்பந்தங்களின் மை காய்வதற்கு முன்பே மேற்குக் கரையில் இஸ்ரேலிய குடியேற்றங்கள் விரிவடையத் தொடங்கின. இன்று, நூற்றுக்கும் மேற்பட்ட இஸ்ரேலிய குடியேற்றங்கள் மேற்குக் கரையிலும் பாலஸ்தீன கிழக்கு ஜெருசலேமிலும் பரவியுள்ளன. இஸ்ரேலிய ஆக்கிரமிப்பால் பாலஸ்தீனிய மக்கள்தொகை தொடர்புகள் திட்டமிட்ட முறையில் துண்டிக்கப்பட்டுள்ளன. பாலஸ்தீனிய கிராமங்கள் வழியாக இஸ்ரேல் விஷப்பாம்புகளால் "இனவெறி சுவர்" கட்டப்பட்டது. இஸ்ரேலிய ஆக்கிரமிப்பாளர்களால் சிறந்த நிலம் மற்றும் நீர் வளங்கள் பெருமளவில் கையகப்படுத்தப்பட்டு பாலஸ்தீனியர்கள் அவர்கள் வாழ்ந்த நிலத்திலிருந்து விரட்டியடிக்கப்பட்டனர்.

P.A., ஒரு சுதந்திர அரசை நடத்தும் நிர்வாகமாக பரிணமிப்பதற்குப் பதிலாக, பாலஸ்தீனியர்களை நிரந்தரமாக அடிபணிய வைப்பதற்காக, இஸ்ரேல் மற்றும் அமெரிக்கா பயன்படுத்தும் கருவியாக மாற்றப்பட்டுள்ளது. ஒஸ்லோ உடன்படிக்கையின் கீழ், P.A. பயங்கரவாதத்திற்கு எதிரான போர் எனும்பெயரில் இஸ்ரேலுடன் சமரசம் செய்து கொண்டது. பி.ஏ. மேற்குக் கரையில் காவல் துறையைத் தவிர அடிப்படை சுகாதாரம் மற்றும் கல்விச் சேவைகளை வழங்குவதில் தன்னைத்தானே சுருக்கிக் கொண்டது. இஸ்ரேலிய படைகளுக்கு அவர்கள் விரும்பியபடி மேற்குக் கரைக்குள் நுழைய உரிமை உண்டு. மேற்குக் கரையின் 60% இஸ்ரேலின் நேரடிக் கட்டுப்பாட்டில் உள்ளது. பாலஸ்தீனர்களை கட்டுப்படுத்தும் கருவியாக P.A. அமெரிக்காவின் உதவியுடன் அமைக்கப்பட்டது. மேற்குக் கரையில் இருந்து இஸ்ரேல் மீது மிகக்குறைவான தாக்குதல்களே நடந்துள்ளன. அமெரிக்கா இஸ்ரேலுடன் இணைந்து அதையும் கட்டுபடுத்தினர். 

'நூற்றாண்டின் கன்னத்தில் விழுந்த அறை'

10ல் ஏழு பாலஸ்தீனியர்கள் பி.ஏ. இஸ்ரேலுடனான பாதுகாப்பு ஒத்துழைப்பை நிறுத்த வேண்டும் என்கின்றனர். மற்றொரு புதிய கணக்கெடுப்பின்படி, மேற்குக் கரையில் வசிக்கும் பாலஸ்தீனியர்களில் பாதிக்கும் மேற்பட்டவர்கள் P.A. உடன் அதிருப்தி அடைந்துள்ளனர், மேலும் அதை மக்கள் மீதான சுமையாகக் கருதுகின்றனர். அதற்காக, பி.ஏ. ஜனாதிபதி, மஹ்மூத் அப்பாஸ், ஜனவரி மாதம், ஒஸ்லோ செயல்முறை "இறந்ததாக" அறிவித்தார், அதன் மரணத்திற்கு இஸ்ரேலியர்களைக் குற்றம் சாட்டினார். "நூற்றாண்டின் ஒப்பந்தம் நூற்றாண்டின் கன்னத்தில் விழுந்த அறையாகும்," என்று அவர் கூறினார். நீண்டகாலமாக நீடித்து வரும் இஸ்ரேல்-பாலஸ்தீன மோதல்களை முடிவுக்குக் கொண்டுவர முன்வைத்த முன்மொழிவு மற்றும் "நூற்றாண்டின் ஒப்பந்தம்" என்று ட்ரம்ப் பெருமையடித்து ஒஸ்லோ உடன்படிக்கையில் சமாதான முன்மொழிவுகளை ஏற்றுக்கொள்வதற்கு வலியுறுத்தியது. அது P.A-வின் கைகளை முறிப்பதற்கான டிரம்ப் நிர்வாகத்தின் முயற்சி என்றும் அப்பாஸ் சாடினார்..

ஓஸ்லோ ஒப்பந்தங்கள், புலம்பெயர்ந்தோர், இஸ்ரேல், மேற்குக்கரை மற்றும் காசாவில் வாழும் பாலஸ்தீனிய மக்களின் மூன்று பிரிவுகளின் குறைந்தபட்ச தேசிய மற்றும் அரசியல் உரிமைகளுக்கு கூட உத்தரவாதம் அளிக்காததால் அதை இறந்தே பிறந்த குழந்தை என்றார் பாலஸ்தீனிய கல்வியாளரான ஹைதர் ஈத். "கைதிகளை சித்திரவதை செய்தலை சட்டப்பூர்வமாக்கியது, விரட்டியடித்தல், படுகொலை மற்றும் ஆக்கிரமிப்பு ஆகியவை இருக்கும் வரை, முழுமையான அமைதியை அடைய முடியாது" என்றும் அவர் கூறினார்.

ஒஸ்லோ ஒப்பந்தங்கள் ஆக்கிரமிக்கப்பட்ட பகுதிகளிலும் இஸ்ரேலிலும் இனவெறி பிடித்த சட்டங்களை அறிமுகப்படுத்த வழிவகுத்தன என்று பல பாலஸ்தீனியர்கள் கருதுகிறார்கள். பாலஸ்தீனியர்கள் தங்கள் சொந்த நிலத்தில் வெளிப்படையாக பாகுபாடு காட்டப்படுகிறார்கள். இந்த ஆண்டின் தொடக்கத்தில் இஸ்ரேல் யூத நாடாக பிரகடனம் செய்தது ஒரு எடுத்துக்காட்டு. இஸ்ரேலில் யூதர்கள் அல்லாதவர்கள் இரண்டாம் தர குடிமக்களாக்கப்பட்டுள்ளனர்.

ஒஸ்லோ உடன்படிக்கையை ஏற்க மறுத்த ஹமாஸ், காசா பகுதிக்குள் சுருக்கப்பட்டுள்ளது. ஹமாஸும் இன்னும் சில பாலஸ்தீனிய அமைப்புகளும் இந்த ஒப்பந்தத்தால் பரிந்துரைக்கப்பட்ட இரு தேசக் கொள்கை, பாலஸ்தீன மக்களின் "மீள் குடியேற்ற உரிமையை" பறிக்கும் என்று எச்சரித்துள்ளன.

2006ல் காசாவில் நடத்தப்பட்ட முதல் தேர்தலில் ஹமாஸ் வெற்றி பெற்றது. இஸ்ரேலியர்களும், பிஎல்ஓவின் மேலாதிக்கப் பிரிவினரும் பாலஸ்தீனிய வாக்காளர்களின் தீர்ப்போடு ஒருபோதும் ஒத்துப்போகவில்லை. இஸ்ரேலும் அதன் ஆதரவாளர்களும் ஹமாஸை ஒரு பயங்கரவாத அமைப்பாகக் கருதி காசாவிற்குள் தள்ளினார்கள். காசாவின் மீது, இஸ்ரேல் மூன்று முழு அளவிலான போர்களை நடத்தியது. ஆயிரக்கணக்கான பாலஸ்தீனியர்கள் கொல்லப்பட்டதோடு காசாவின் உள்கட்டமைப்புகளும் அழிக்கப்பட்டுள்ளது. அவர்கள் மீது சுமைகள் குவிந்தாலும், சர்வதேச சமூகத்தின் தொடர்ச்சியான அலட்சியம் இருந்தபோதிலும், காஸா மக்கள் தளரவில்லை. காஸாவின் 80 சதவீத மக்கள் ஓஸ்லோ உடன்படிக்கையின் படி தாயகம் திரும்புவதற்கான உரிமை மறுக்கப்பட்ட அகதிகளாவர்.

டிரம்பின் அப்பட்டமான முயற்சிகள்

ஒஸ்லோ உடன்படிக்கையின் 25 வது ஆண்டு நிறைவை டொனால்ட் டிரம்ப் அரசு இஸ்ரேல்-அரபு தகராறில் நடுநிலை வேடத்தை கலைப்பதற்குத் தேர்ந்தெடுத்துள்ளது. அகதிகள் முகாம்களில் வாழும் பாலஸ்தீனியர்கள் மீதான அடக்குமுறைகளை இது மேலும் முடுக்கியுள்ளது. "இருதேசக் கொள்கையை" முற்றிலுமாக சிதைக்கும் டிரம்ப் நிர்வாகத்தின் முயற்சிகளுக்கு பெரிய அரபு நாடுகள் எதுவும் எதிர்ப்பு தெரிவிக்கவில்லை. உண்மையில், சவூதி அரேபியா போன்ற முக்கிய அரபு நாடுகளின் மறைமுக ஆதரவை வாஷிங்டன் பெற்றுள்ளது. டிரம்ப் நிர்வாகம், பாலஸ்தீனியர்களுக்கு அவர்கள் மறுக்கத் துணியாத ஒரு ஒப்பந்தத்தை வழங்கத் தயாராகும் அதே வேளையில், வாஷிங்டனில் உள்ள PLO அலுவலகத்தை மூடவும், P.A-க்கான அனைத்து மனிதாபிமான நிதிகளையும் துண்டிக்கவும் உத்தரவிட்டது. இந்த நடவடிக்கை, இஸ்ரேலிய நெசெட் இயற்றிய தேசிய-அரசு சட்டத்துடன் இணைந்து, ஒஸ்லோ உடன்படிக்கை மற்றும் சர்வதேச அளவில் அங்கீகரிக்கப்பட்ட சமாதான முன்னெடுப்புகளை அமெரிக்கா இப்போது அதிகாரப்பூர்வமாக கைவிட்டுள்ளது என்பதை வெளிபடுத்தியுள்ளது. ஜூலை மாதம் நிறைவேற்றப்பட்ட தேசிய-அரசு சட்டம் இஸ்ரேலின் மக்கள் தொகையிலுள்ள 20% பாலஸ்தீனியர்களை இரண்டாம் தர குடிமக்களாக்கியுள்ளது. இஸ்ரேல் அரசு "யூத மக்களுக்கு தனித்துவமானது" என்று புதிதாக நிறைவேற்றப்பட்ட சட்டம் கூறுவதோடு ஜோர்டான் நதியிலிருந்து மத்தியதரைக் கடல் வரை மேற்குக் கரை முழுவதும் அதற்கு அப்பாலும் பரந்து விரிந்துள்ள "Eretz Yisrael" (பெரும் இஸ்ரேல்) முழுவதும் யூத குடியேற்றங்களை ஊக்குவிக்கிறது.

அறிக்கைகளின்படி, டிரம்ப் சமாதான திட்டம் என்று அழைக்கப்படுவது இஸ்ரேலிய பிரதமர் நெதன்யாகுவின் "பொருளாதார அமைதி" திட்டத்தை அடிப்படையாகக் கொண்டது, இதன் மூலம் பல கடுமையான பொருளாதார கட்டுப்பாடுகளை நீக்குவதற்கு ஈடாக பாலஸ்தீனியர்கள் தங்கள் அடிப்படை அரசியல் உரிமைகளை விட்டுவிடுவார்கள் என்று எதிர்பார்க்கப்படுகிறது. ஆக்கிரமிக்கப்பட்ட பிரதேசங்களில் வைக்கவும். டிரம்பின் மருமகன் ஜாரெட் குஷ்னரின் மேற்பார்வையில் இந்த திட்டம் உருவாக்கப்பட்டது. குஷ்னரும் அவரது குடும்பத்தினரும் ஜியோனிஸ்டுகளாவர்; நெதன்யாகு மற்றும் இஸ்ரேலின் வலதுசாரி குடியேற்ற இயக்கத்திற்கு நெருக்கமானவர்கள். பாலஸ்தீன விவகாரத்தில் இஸ்ரேலின் அனைத்து அடாவடி நடவடிக்கைகளுக்கும் டிரம்ப் அரசு துணையாக இருந்தது. அமெரிக்கா இப்போது ஜெருசலேம் பிரச்சனை பேச்சுவார்த்தைக்கு உட்பட்டதல்ல என்றும், அகதிகளுக்கு இனி திரும்புவதற்கு உரிமை இல்லை என்றும், ஆக்கிரமிக்கப்பட்ட நிலப்பரப்பில் உள்ள சட்டவிரோத இஸ்ரேலிய குடியேற்றங்கள் அங்கேயே இருக்க வேண்டும் என்றும் ஆணையிட்டுள்ளது. பாலஸ்தீனியர்களுக்கு முழு அதிகார அந்தஸ்து வழங்கப்படும் என்ற கேள்விக்கே இனி இடமில்லை என்ற இஸ்ரேலிய அரசாங்கத்தின் நிலைப்பாட்டை ஒப்பித்ததோடு, ஆக்கிரமிக்கப்பட்ட பிரதேசங்களில் இஸ்ரேல் தொடர்ந்து முழு கட்டுப்பாட்டை வைத்திருக்கும் என்று மீண்டும் வலியுறுத்தியுள்ளது ட்ரம்ப் அரசு.

டிரம்ப் நிர்வாகத்தால் வழங்கப்பட்ட "நூற்றாண்டின் ஒப்பந்தம்" "வந்தவுடனே இறந்துவிட்டதாக" மூத்த பாலஸ்தீனிய அதிகாரிகள் கூறியுள்ளனர். அமெரிக்க தூதரகம் ஜெருசலேமுக்கு மாற்றப்பட்ட பிறகு டிரம்ப் நிர்வாகத்துடன் பேசுவதில்லை என்ற தனது முடிவை பி.ஏ. மீண்டும் வலியுறுத்தியுள்ளது. காசா மற்றும் மேற்குக் கரையில் அப்பாவி பொதுமக்கள் மீதான இஸ்ரேலிய தாக்குதல்கள் மற்றும் சட்டவிரோத குடியேற்றங்களை சர்வதேச குற்றவியல் நீதிமன்றத்திற்கு (ICC) பரிந்துரைப்பது என்ற P.A.யின் முடிவு டிரம்ப் அரசை ஆத்திரமூட்டியுள்ளது. அமெரிக்கா அல்லது இஸ்ரேல் போன்ற அதன் நெருங்கிய கூட்டாளிகளின் போர்க்குற்றம் தொடர்பான வழக்குகளை விசாரிக்கத் துணிந்ததற்காக தடைகள் விதிக்கப்படும் என ஐசிசியை கூட அமெரிக்க தேசிய பாதுகாப்பு ஆலோசகர் ஜான் போல்டன் அச்சுறுத்தினார். ஆப்கானிஸ்தானில் அமெரிக்கப் படைகள் செய்த அட்டூழியங்கள் தொடர்பான போர்க்குற்ற வழக்குகளையும் விசாரிக்க ஐசிசி திட்டமிட்டுள்ளது.

பாலஸ்தீனியர்களுக்கான அனைத்து உதவிகளையும் நிறுத்தி வாஷிங்டனில் உள்ள P.A அலுவலகத்தை மூடும் அமெரிக்க முடிவுக்கு பிறகு பாலஸ்தீனத்தின் தலைமை தூதரான சயீத் எரேகாட், அமெரிக்காவின் மற்றொரு சமாதான உடன்படிக்கையை மேற்கொள்வதற்காக இனி எமது மக்கள் கொடுமைப்படுத்தப்பட மாட்டார்கள் என்று கூறினார். மேலும் “பாலஸ்தீன மக்களின் உரிமைகள் விற்பனைக்கு இல்லை; நாங்கள் அமெரிக்காவின் அச்சுறுத்தல்கள் மற்றும் கொடுமைப்படுத்துதலுக்கு அடிபணிய மாட்டோம்; நீதி மற்றும் சுதந்திரத்திற்கான எங்கள் நியாயமான போராட்டத்தை நாங்கள் தொடர்வோம்; சாத்தியமான அனைத்து சட்ட மற்றும் அரசியல் வழிமுறைகளை கையாள்வோம் என்பதை நாங்கள் மீண்டும் வலியுறுத்துகிறோம்" என்றார்.

- வெண்பா (தமிழில்)

மூலக்கட்டுரை: https://frontline.thehindu.com/world-affairs/article25037186.ece