ஈரான் எண்ணெயை கொள்முதல் செய்ய அனுமதி கோரி அமெரிக்காவிடம் மண்டியிடும் இந்தியா

ரஷ்யாவுடனான வர்த்தகத்தைக் கட்டுப்படுத்த உதவும் வகையில், ஈரான் எண்ணெயை இறக்குமதி செய்ய அனுமதிக்க வேண்டும் என அமெரிக்காவிடம் இந்தியா கோரிக்கை விடுத்துள்ளது.

தெற்காசிய நாடான இந்தியாவின் சுத்திகரிப்பு ஆலைகள் ரஷ்யாவிடமிருந்து எண்ணெய் இறக்குமதியைக் கணிசமாகக் குறைப்பதற்கு, பொருளாதாரத் தடைகளுக்கு உள்ளான ஈரான் மற்றும் வெனிசுலா போன்ற நாடுகளிடமிருந்து கச்சா எண்ணெயை வாங்க அமெரிக்கா அனுமதிக்க வேண்டும் என்று இந்திய அதிகாரிகள் டிரம்ப் நிர்வாகத்திடம் மீண்டும் கோரியுள்ளனர்.

இந்த வாரம் அமெரிக்காவிற்குச் சென்றுள்ள ஒரு தூதுக்குழு, அமெரிக்க அதிகாரிகளுடனான சந்திப்புகளில் இந்தக் கோரிக்கையை மீண்டும் வலியுறுத்தியதாக, இது குறித்த பேச்சுவார்த்தைகள் தனிப்பட்டவை என்பதால் தனது பெயரை வெளியிட விரும்பாத, இது குறித்து அறிந்த ஒருவர் கூறினார். ரஷ்யா, ஈரான் மற்றும் வெனிசுலா ஆகிய மூன்று முக்கிய எண்ணெய் உற்பத்தியாளர்களிடமிருந்தும் இந்திய சுத்திகரிப்பு ஆலைகளுக்கான விநியோகத்தை ஒரே நேரத்தில் துண்டிப்பது, உலகளாவிய எண்ணெய் விலையில் ஒரு பெரிய உயர்வுக்கு வழிவகுக்கும் என்று இந்தியப் பிரதிநிதிகள் வலியுறுத்தியதாக, இந்தப் பேச்சுவார்த்தைகளை நன்கு அறிந்தவர்கள் மேலும் தெரிவித்தனர்.

புதுதில்லியில் உள்ள அமெரிக்கத் தூதரகத்தின் செய்தித் தொடர்பாளர், தனிப்பட்ட தூதரகப் பேச்சுவார்த்தைகள் குறித்துக் கருத்து தெரிவிக்க மறுத்துவிட்டார். இருப்பினும், இந்தியாவின் ரஷ்ய கச்சா எண்ணெய் கொள்முதலானது, "ரஷ்யாவின் தீங்கு விளைவிக்கும் நடவடிக்கைகளை எதிர்கொள்ள" அமெரிக்கா எடுக்கும் முயற்சிகளைப் பலவீனப்படுத்துகிறது என்று அவர் மேலும் கூறினார். இது குறித்து கருத்துரைக்க இந்திய வர்த்தகம் மற்றும் பெட்ரோலிய அமைச்சகங்கள் தயாரில்லை.

ரஷ்யாவுடனான எண்ணெய் வர்த்தகத்திற்குத் தண்டனையாக அமெரிக்கா இந்தியாவின் மீது கடுமையான வரிகளை விதித்ததைத் தொடர்ந்து, இந்திய பிரதிநிதிகள் பேச்சுவார்த்தைக்காக அமெரிக்காவுக்குச் சென்றனர். இந்த வரிகள் இருந்தபோதிலும், இந்தியா, ஓபெக்+ (OPEC+) உற்பத்தியாளரிடமிருந்து தனது கச்சா எண்ணெய் கொள்முதலை குறைந்த விகிதத்திலாவது செய்து கொண்டுதான் உள்ளது.

அமெரிக்க எண்ணெய் மற்றும் எரிவாயுவை வாங்குவதை அதிகரிக்க இந்தியா விரும்புவதாகவும், "நமது எரிசக்திப் பாதுகாப்பு இலக்குகளில் அமெரிக்காவின் ஈடுபாடு மிக அதிகமாக இருக்கும்" என்றும் இந்திய வர்த்தக அமைச்சர் பியூஷ் கோயல் இந்த வாரம் கூறினார். நியூயார்க்கில் அவர் இந்தக் கருத்துக்களைத் தெரிவித்தார்.

உக்ரைன் போர் காரணமாகப் பல நாடுகள் ரஷ்யாவுடனான வர்த்தகத்தைத் தவிர்த்ததால், ரஷ்யா தனது கச்சா எண்ணெயைத் தள்ளுபடி விலையில் விற்க வேண்டிய கட்டாயத்திற்கு உள்ளானது. இந்தியாவின் எண்ணெய் தேவைகளில் கிட்டத்தட்ட 90% இறக்குமதி மூலமே பூர்த்தி செய்யப்படுகிறது. மலிவான ரஷ்ய பேரல்கள் அதன் இறக்குமதிச் செலவின் சுமையைக் குறைக்க உதவியுள்ளன. ஈரான் மற்றும் வெனிசுலா எண்ணெயும் இதேபோல் தள்ளுபடி விலையில் கிடைக்கும்.

இந்தியா 2019-ல் ஈரானிய எண்ணெய் வாங்குவதை நிறுத்தியது. மேலும், அமெரிக்கா தடைகளைக் கடுமையாக்கியதால், நாட்டின் மிகப்பெரிய தனியார் சுத்திகரிப்பு நிறுவனமான ரிலையன்ஸ் இண்டஸ்ட்ரீஸ் லிமிடெட் (Reliance Industries Ltd.), இந்த ஆண்டு வெனிசுலா கச்சா எண்ணெய் வாங்குவதை நிறுத்தியது. சுத்திகரிப்பு நிறுவனங்கள் மத்திய கிழக்கு நாடுகளிடமிருந்து அதிக பேரல்களை வாங்க முடியும், ஆனால் அது அதிக செலவாகும் என்பதுடன், ஒட்டுமொத்த இறக்குமதிச் செலவையும் அதிகரிக்கும்.

வர்த்தக அமைச்சகத்தின் தரவுகளின்படி, எண்ணெய் சுத்திகரிப்பு நிறுவனங்கள் ஜூலை மாதத்தில் ரஷ்ய கச்சா எண்ணெய்க்கு ஒரு பேரலுக்கு சராசரியாக $68.90 செலுத்தின. சவூதி அரேபியாவிடமிருந்து வாங்கியதற்கு $77.50 மற்றும் அமெரிக்காவிடமிருந்து வாங்கியதற்கு $74.20 செலுத்தியதுடன் ஒப்பிடுகையில் இது குறைவாகும். கப்பல்கள் மூலம் வழங்கப்படும் ரஷ்ய எண்ணெயை வாங்கும் மிகப்பெரிய நாடு இந்தியாவாகும், அதே நேரத்தில் குழாய்வழி விநியோகம் உட்பட ஒட்டுமொத்தமாக மிகப்பெரிய இறக்குமதியாளர் சீனாவாகும்.

ஓபெக்+ (OPEC+) கூட்டணியும் அந்த குழுவிற்கு வெளியே உள்ள உற்பத்தியாளர்களும் உற்பத்தியை அதிகரிப்பதால், அடுத்த ஆண்டு எண்ணெய் சந்தையில் ஒரு பெரிய தேக்கநிலை ஏற்பட வாய்ப்புள்ளது. இது உலகளாவிய கச்சா எண்ணெய் விலையில் சரிவை ஏற்படுத்தும் என்று எதிர்பார்க்கப்படுகிறது.

(ருச்சி பாட்டியா, ராகேஷ் சர்மா)

வெண்பா (தமிழில்)

மூலக்கட்டுரை: https://www.bloomberg.com/news/articles/2025-09-25/india-asks-us-to-allow-iran-oil-in-order-to-curb-russia-trade

Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு