நேட்டோ நாடுகளின் வான்பரப்பில் பறந்ததா ரஷ்ய போர்விமானங்கள்?

ரஷ்ய போர் விமானங்கள் எஸ்தோனிய வான்வெளியை மீறவில்லை என ரஷ்ய பாதுகாப்பு அமைச்சகம் தகவல்

ரஷ்ய போர் விமானங்கள் எஸ்தோனிய வான்வெளியை மீறவில்லை என்றும், அவை வடமேற்கு ரஷ்யாவிலிருந்து ரஷ்யாவின் பால்டிக் வெளிநிலப்பகுதியான கலினின்கிராடிற்குச் செல்லும் வழியில் பால்டிக் கடலின் நடுவே பறந்ததாகவும் ரஷ்ய பாதுகாப்பு அமைச்சகம் தெரிவித்தது.

நேட்டோ உறுப்பு நாடான எஸ்தோனியா அரசு, மூன்று ரஷ்ய இராணுவ விமானங்கள் தங்கள் வான்வெளியை 12 நிமிடங்கள் மீறியதாகவும், இது "முன்னெப்போதும் இல்லாத தைரியமான" ஊடுருவல் என்றும் கூறியது. 20க்கும் மேற்பட்ட ரஷ்ய ஆளில்லா விமானங்கள் போலந்து வான்வெளிக்குள் நுழைந்து, அவற்றில் சில நேட்டோ விமானங்களால் சுட்டு வீழ்த்தப்பட்ட ஒரு வாரத்திற்குப் பிறகு இந்தச் சம்பவம் நிகழ்ந்துள்ளது.

சர்வதேச விதிகளுக்கு உட்பட்டே விமானம் பறந்தது

"மூன்று MiG-31 போர் விமானங்களின் பயணம், வான்வெளி தொடர்பான சர்வதேச விதிகளுக்கு முழுமையாக கட்டுப்பட்டே மேற்கொள்ளப்பட்டது. மற்ற நாடுகளின் எல்லைகளை மீறவில்லை என்பது தெளிவாக உறுதிப்படுத்தப்பட்டுள்ளது. பயணத்தின் போது, ரஷ்ய விமானங்கள் ஒப்புக்கொள்ளப்பட்ட விமானப் பாதையிலிருந்து விலகவுமில்லை எஸ்தோனிய வான்வெளியை மீறவுமில்லை".," என்று ரஷ்ய பாதுகாப்பு அமைச்சகம் டெலிகிராம் பதிவில் கூறியது.

வடமேற்கு ரஷ்யப் பகுதியான கரேலியாவிலிருந்து புறப்பட்ட இந்த விமானங்களின் பாதை, எஸ்தோனிய கடற்கரையோரத்தில் அமைந்துள்ள 'வைண்ட்லூ தீவிலிருந்து 3 கி.மீ.க்கும் அப்பால் பால்டிக் கடலின் நடுவேதான்' இருந்ததாக அந்த அறிக்கை கூறியது.

ராய்ட்டர்ஸ்

https://www.straitstimes.com/world/europe/Russia-presses-global-aviation-gathering-to-ease-sanctions-over-safety-concerns

=========================================================

பால்டிக் கடல் வான்பரப்பிற்குள் ரஷ்ய ராணுவ விமானம் நுழைந்தது: ஜெர்மனி

எஸ்தோனிய வான்வெளியை ரஷ்யா மீறியது குறித்து விவாதிக்க, நேட்டோவின் வட அட்லாண்டிக் கவுன்சில் செப்டம்பர் 23 அன்று கூடுவிருப்பதாக இரண்டு அதிகாரிகள் ஞாயிற்றுக்கிழமை ராய்ட்டர்ஸிடம் தெரிவித்தனர்.

பால்டிக் கடலின் நடுநிலை வான்பரப்பிற்குள் நுழைந்த ரஷ்யாவின் IL-20m ரக ராணுவ விமானத்தைக் கண்காணிக்க, ஜெர்மனியின் விமானப்படை ஞாயிற்றுக்கிழமை (செப்டம்பர் 21, 2025) காலை இரண்டு யூரோஃபைட்டர்களை அனுப்பியதாகவும், பின்னர் அந்தப் பொறுப்பை ஸ்வீடனில் உள்ள நேட்டோ கூட்டாளிகளிடம் ஒப்படைத்ததாகவும் அது கூறியது.

"மீண்டுமொருமுறை, இரண்டு யூரோஃபைட்டர்களைக் கொண்ட எங்களின் விரைந்து செயல்படும் எச்சரிக்கைப் படை, சர்வதேச வான்பரப்பில் விமானப் பயணத் திட்டம் அல்லது ரேடியோ தொடர்பு இல்லாமல் பறந்த அடையாளம் தெரியாத விமானத்தை விசாரிக்க நேட்டோவால் பணிக்கப்பட்டது. அது ஒரு ரஷ்ய IL-20M ரக உளவு விமானம். நேரில் அடையாளம் கண்ட பிறகு, அந்த பாதுகாப்புப் பணிகளை எங்கள் நேட்டோ கூட்டாளியான ஸ்வீடனிடம் ஒப்படைத்துவிட்டு, நாங்கள் ரோஸ்டாக்-லேஜிற்குத் திரும்பினோம்" என்று ஜெர்மனியின் விமானப்படை கூறியது.

மூன்று ரஷ்ய MiG-31 ரக போர் விமானங்கள் வெள்ளிக்கிழமை அனுமதியின்றி எஸ்தோனிய வான்வெளிக்குள் நுழைந்து, மொத்தம் 12 நிமிடங்கள் உலவியதாகவும், பின்னர் அவை பின்வாங்கும்படி கட்டாயப்படுத்தப்பட்டதாகவும் எஸ்தோனியா அரசு கூறியது.

https://www.thehindu.com/news/international/russian-military-plane-entered-airspace-over-baltic-sea-germany/article70077420.ece/amp/

============================================================================

பால்டிக் கடற்பரப்பில் ரஷ்ய ராணுவ விமானத்தை இடைமறித்த ஜெர்மன் - ஸ்வீடன் விமானங்கள்

பாரிஸின் வடக்கே உள்ள லே பூர்ஜேயில் ஜூன் 18 அன்று ஒரு ஜெர்மன் யூரோஃபைட்டர் டைஃபூன் போர் விமானம் ஒரு கண்காட்சி விமான செயல்விளக்கத்தில் ஈடுபட்டது. ரஷ்ய விமானத்தை இடைமறிக்க யூரோஃபைட்டர்கள் பயன்படுத்தப்பட்டன.

ஜெர்மனி மற்றும் ஸ்வீடன் அதிகாரிகளின் கூற்றுப்படி, ஞாயிற்றுக்கிழமை காலை பால்டிக் கடற்பகுதியில் நடுநிலை வான்பரப்பிற்குள் நுழைந்த ரஷ்ய உளவு விமானத்தை இடைமறிப்பதற்காக ஜெர்மன் மற்றும் ஸ்வீடன் போர் விமானங்கள் விரைந்து அனுப்பப்பட்டன.

அனுமதி அல்லது ரேடியோ தொடர்பு இல்லாமல் பறக்கும் அடையாளம் தெரியாத விமானம் குறித்து விசாரிக்குமாறு ஜெர்மனியின் "விரைவு படைக்கு" நேட்டோ உத்தரவிட்டதாக ஜெர்மன் அதிகாரிகள் தெரிவித்தனர். "அந்த விமானம் ஒரு ரஷ்ய IL-20M உளவு விமானம் என்பது தெரியவந்தது. அதை நேரில் அடையாளம் கண்ட பிறகு, புண்டஸ்வேர் [ஜெர்மன் ராணுவம்] பாதுகாப்புப் பணியை தங்கள் நேட்டோ கூட்டாளிகளான ஸ்வீடனிடம் ஒப்படைத்துவிட்டு ரோஸ்டாக்-லேஜுக்குத் திரும்பியது," என்று நேட்டோவிற்கான ஜெர்மனியின் பிரதிநிதிகள் குழு X தளத்தில் ஒரு பதிவில் கூறியது.

ஸ்வீடனின் விமானப்படை "சர்வதேச வான்பரப்பில் ஒரு ரஷ்ய IL-20 உளவு விமானத்தை அடையாளம் கண்டு கண்காணித்து வருவதாக" கூறியது.

செப்டம்பர் மாதம் நேட்டோ வான்பரப்பில் ரஷ்ய ராணுவ விமானங்கள் தொடர்ச்சியாக அத்துமீறியதைத் தொடர்ந்து, நேட்டோவிற்கும் ரஷ்யாவிற்கும் இடையே பதட்டங்கள் அதிகரித்துள்ள நிலையில், இது சமீபத்திய நிகழ்வாகும். வெள்ளிக்கிழமை, மூன்று ரஷ்ய MiG-31 போர் விமானங்கள் அனுமதியின்றி தங்கள் வான்பரப்பிற்குள் நுழைந்து மொத்தம் 12 நிமிடங்கள் அங்கு இருந்ததாக எஸ்தோனியா கூறியது. எஸ்தோனிய பிரதமர் கிறிஸ்டன் மைக்கல், நேட்டோவின் 4-வது விதியை அமல்படுத்தினார். இது, எந்தவொரு உறுப்பு நாடும் தங்களுக்கு அச்சுறுத்தல் இருப்பதாக நம்பினால், கூட்டணியுடன் கலந்தாலோசனை நடத்த அனுமதிக்கிறது.

எஸ்தோனியா இந்த நிகழ்விற்கு எதிர்ப்பு தெரிவித்து மாஸ்கோவின் பொறுப்புத் தூதரை அழைத்து கண்டனம் தெரிவித்தது. ஆனால், ரஷ்ய பாதுகாப்பு அமைச்சகம் எஸ்தோனிய வான்பரப்பை மீறியதாகக் கூறப்படும் குற்றச்சாட்டை மறுத்தது. இந்த சம்பவம் குறித்து செய்தியாளர்கள் வெள்ளிக்கிழமை அதிபர் டிரம்பிடம் கேட்டனர். "சரி, எனக்கு இது பிடிக்கவில்லை. இது நடப்பதை நான் விரும்பவில்லை. இது பெரிய சிக்கலை ஏற்படுத்தக்கூடும்," என்று டிரம்ப் கூறினார்.

செப்டம்பர் 10 அன்று, ஒரு டசனுக்கும் அதிகமான ரஷ்ய ட்ரோன்கள் போலந்து வான்பரப்பிற்குள் நுழைந்ததைத் தொடர்ந்து, போலந்து அவற்றில் சிலவற்றைச் சுட்டு வீழ்த்தியது. இதற்குப் பிறகு, சில நாட்களுக்கு முன்பு நேட்டோவின் 4-வது விதி போலந்தால் செயல்படுத்தப்பட்டது.

போலந்து பிரதமர் டொனால்ட் டஸ்க் இந்த நிகழ்வை, "இரண்டாம் உலகப் போருக்குப் பிறகு, நாம் வெளிப்படையான மோதலுக்கு மிக அருகில் வந்தது இதுவேயாகும்" என்று குறிப்பிட்டார். மற்றொரு சம்பவத்தில், செப்டம்பர் 14 அன்று, ஒரு ரஷ்ய ட்ரோன் தனது வான்பரப்பை மீறியதாக ருமேனியா தெரிவிщиத்தது. இந்த சம்பவம் உக்ரைனின் ஆத்திரமூட்டும் செயல் என்று ரஷ்யா ஆதாரமின்றி குற்றம் சாட்டியது.

எஸ்தோனியாவின் பாதுகாப்பு அமைச்சர் ஹன்னோ பெவ்கூர், எஸ்தோனியாவின் பொது ஒளிபரப்பு நிறுவனமான ERR-க்கு அளித்த பேட்டியில், ரஷ்யாவின் மீறல்களுக்கு எதிராக, தேவைப்பட்டால், நேட்டோ திறம்பட பதிலடி கொடுக்க முடியும் என்பதை நிரூபித்துள்ளது என்று கூறினார்.

"இதுதான் ரஷ்யா விரும்புவது — உக்ரைனுக்கு உதவுவதிலிருந்து எங்கள் கவனத்தை திசை திருப்பி, எங்கள் சொந்தப் பகுதியிலேயே கவனம் செலுத்த வைப்பது. இது ரஷ்யாவின் மூலோபாய நோக்கங்களில் ஒன்றாகும்: ரஷ்யா உக்ரைனைக் கையாளும்போது, மேற்கு நாடுகள் தங்கள் வேலையைப் பார்த்துக் கொள்ளும்படி செய்வது. இந்த வகையான அச்சுறுத்தல்களுக்குப் பின்னால் உள்ள முக்கிய இலக்கு அதுதான்," என்று பெவ்கூர் கூறினார்.

https://www.npr.org/2025/09/21/nx-s1-5549406/russia-nato-plane-baltic-sea-germany-sweden

===============================================================================

போலந்து அருகே ரஷ்யாவின் வான்வெளி மீறல்களுக்கு நேட்டோ பதிலடி

போலந்து அருகே ரஷ்யாவின் வான்வழித் தாக்குதல்களுக்குப் பிறகு, நேட்டோ விமானங்கள் மீண்டும் நிலைநிறுத்தப்பட்டன; புதிய மூன்றாம் உலகப் போர் குறித்த அச்சம் எழுந்துள்ளது.

ரஷ்யப் போர் விமானங்களுடனான மற்றுமொரு மோதலைத் தொடர்ந்து, இரண்டு நாட்களிலேயே இரண்டாவது முறையாக நேட்டோ போர் விமானங்கள் நிலைநிறுத்தப்பட்டுள்ளன. வெள்ளிக்கிழமை (19.09.2025) அன்று ரஷ்யப் போர் விமானங்கள் எஸ்டோனியாவிற்குள் வழிதவறிச் சென்றபோது, ஏற்றுக்கொள்ள முடியாத மீறல் என்று ஐரோப்பிய யூனியன் கடுமையாக விமர்சித்ததைத் தொடர்ந்து இந்த நடவடிக்கையானது எடுக்கப்பட்டுள்ளது. உக்ரைன் மீது மிகப்பெரிய தாக்குதலை நடத்துகையில் ரஷ்யப் போர் விமானங்கள், ஐரோப்பிய யூனியன் எல்லைகளுக்கு அருகே வழிதவறிச் சென்றதைத் தொடர்ந்து, தாமும் நேச நாடுகளும் போர் விமானங்களை நிலைநிறுத்தியுள்ளதாக போலந்தின் இராணுவம் அறிவித்தது.

உக்ரைன் போரின் போது ரஷ்யாவின் அத்துமீறலைத் தொடர்ந்து போலந்து போர் விமானங்களை நிலைநிறுத்த வேண்டிய கட்டாயத்திற்கு உள்ளானது இது முதல் முறையல்ல என்பதோடு, இரண்டு நாட்களில் இரண்டாவது முறையாக நேட்டோ விமானங்களை நிலைநிறுத்த வேண்டிய கட்டாயத்திற்கு உள்ளாகியுள்ளது. போலந்து, தனது வான் பாதுகாப்பு அமைப்புகளை மிக உயர்ந்த எச்சரிக்கை நிலைக்குச் செயல்படுத்தியதோடு, விமானங்களையும் நிலைநிறுத்தியது என்று அதன் இராணுவம் X தளத்தில் பதிவிட்டதாக 'தி மிரர்' செய்தி வெளியிட்டுள்ளது. மேலும் கூறுகையில், "போலந்து மற்றும் நேச நாடுகளின் விமானங்கள் எங்கள் வான்வெளியில் செயல்படுகின்றன, அதே நேரத்தில் வான் பாதுகாப்பு மற்றும் ராடார் உளவு அமைப்புகள் மிக உயர்ந்த தயார்நிலைக்கு கொண்டு வரப்பட்டுள்ளன," என்றும் தெரிவித்தது.

உக்ரைனுக்கு எதிராக ரஷ்யப் படைகள் நடத்திய வான்வழித் தாக்குதல்கள் நிறுத்தப்பட்ட பிறகு, பிரிட்டிஷ் நேரப்படி அதிகாலை 5 மணியளவில் இந்த நடவடிக்கை முடிவுக்கு வந்ததாக போலந்து மற்றும் அதன் கூட்டாளிகளின் விமானப் படைகள் தெரிவித்தன. ஒரே இரவில் 600-க்கும் மேற்பட்ட ட்ரோன்கள் மற்றும் ஏவுகணைகளால் குறிவைக்கப்பட்ட, "அச்சுறுத்தப்பட்ட பகுதிக்கு அருகிலுள்ள பகுதிகளில் வான்வெளியைப் பாதுகாப்பதை நோக்கமாகக் கொண்ட தடுப்பு நடவடிக்கை" தான் இது என்று போலாந்து கூறியது. 

வெறும் 24 மணி நேரத்தில் தங்கள் இராணுவத்திற்கும் ரஷ்யப் படைகளுக்கும் இடையே 165 மோதல்கள் பதிவாகியுள்ளதாகவும், நாட்டின் ஏறக்குறைய ஒவ்வொரு பிராந்தியமும் எச்சரிக்கை நிலையில் வைக்கப்பட்டுள்ளதாகவும் உக்ரைன் தெரிவித்தது. 

சமீபத்திய தாக்குதலின் போது ரஷ்யா 619 ட்ரோன்களையும் ஏவுகணைகளையும் ஏவியதாக உக்ரேனிய விமானப்படை தெரிவித்துள்ளது; இதில் 579 ட்ரோன்கள், எட்டு பாலிஸ்டிக் ஏவுகணைகள் மற்றும் 32 கப்பல் ஏவுகணைகள் அடங்கும். அவற்றில், 552 ட்ரோன்கள், இரண்டு பாலிஸ்டிக் ஏவுகணைகள் மற்றும் 29 ரஷ்ய கப்பல் ஏவுகணைகள் எனப் பெரும்பான்மையானவற்றைச் சுட்டு வீழ்த்தி செயலிழக்கச் செய்ய முடிந்ததாக அதிகாரிகள் தெரிவித்தனர். விமானப்படை ஒரு அறிக்கையில், "வான்வழித் தாக்குதலின் போது F-16 போர் விமானங்கள், எதிரியின் கப்பல் ஏவுகணைகளைத் திறம்பட எதிர்கொண்டன. மேற்கத்திய ஆயுதங்கள் போர்க்களத்தில் மீண்டும் ஒருமுறை தங்கள் செயல்திறனை நிரூபிக்கின்றன," என்று கூறியது.

உக்ரைன் மீதான ரஷ்யத் தாக்குதல்கள், வெள்ளிக்கிழமையன்று எஸ்டோனிய வான்வெளிக்குள் நடத்தப்பட்ட அத்துமீறலைத் தொடர்ந்து நடந்தன. அப்போது இரண்டு MiG-31 விமானங்கள் "அனுமதியின்றி" நாட்டிற்குள் நுழைந்து, பின்லாந்து வளைகுடாவின் மீது "மொத்தம் 12 நிமிடங்கள்" இருந்ததாக அந்த அரசாங்கம் கூறியது. இந்தச் செயலை நேட்டோ செய்தித் தொடர்பாளர் "பொறுப்பற்ற ரஷ்ய நடத்தைக்கும், அதற்குப் பதிலடி கொடுக்கும் நேட்டோவின் திறனுக்கும் மற்றுமொரு எடுத்துக்காட்டு" என்று கூறியதைத் தொடர்ந்து, இத்தாலி, சுவீடன் மற்றும் பின்லாந்து ஆகிய நாடுகளிலிருந்து விமானங்கள் விரைந்து அனுப்பப்பட்டன. எஸ்டோனியாவின் பிரதமர் கிறிஸ்டன் மைக்கல் ஒரு அறிக்கையில், நேட்டோவின் பதிலடி "எந்தவொரு அச்சுறுத்தலுக்கும் எதிராக ஒன்றுபட்டதாகவும் வலுவானதாகவும் இருக்க வேண்டும்" என்று கூறினார்.

"பகிரப்பட்ட சூழ்நிலை குறித்த விழிப்புணர்வை உறுதி செய்வதற்கும், நமது அடுத்தகட்ட கூட்டு நடவடிக்கைகள் குறித்து உடன்படுவதற்கும் நமது கூட்டாளிகளுடன் கலந்தாலோசிப்பது அவசியம் என்று நாங்கள் கருதுகிறோம்," என்றும் அவர் கூறினார். இந்த அத்துமீறல், டிரம்பிடமிருந்து கோபமானதொரு பதிலை வெளிபடுத்தியது. "எனக்கு இது பிடிக்கவில்லை. இது நடப்பதை நான் விரும்புவதில்லை. இது பெரிய சிக்கலை ஏற்படுத்தக்கூடும்" என்று அவர் கூறினார்.

https://stories.apexnews-af.com/news/detail/d6a725c137fbee9e7d366669598053cc?country=zz&language=en&entry_id=3731f9250920en_gb&request_id=PUSH_21bb630e-173c-42b0-b508-35d45ec3c5b9&from=opera_push&client=opera

வெண்பா (தமிழில்)

Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு