உக்ரைன் போர்: 'உலகிற்கான கடிதத்தை' வெளியிட்ட டிரம்ப்

நேட்டோ உறுப்பினர்கள் தனது நிபந்தனைகளுக்கு ஒப்புக்கொள்ளவில்லை என்றால், அவர்கள் 'தனது நேரத்தையும், அமெரிக்காவின் நேரம், ஆற்றல் மற்றும் பணத்தையும் வீணடிக்கிறார்கள்' என்று முப்படைகளின் தலைமைத் தளபதி கூறினார். ரஷ்யாவின் உக்ரைன் படையெடுப்பை 'விரைவில்' முடிவுக்குக் கொண்டுவரக்கூடிய ஒரு மாபெரும் திட்டம் தன்னிடம் இருப்பதாக டொனால்ட் டிரம்ப் கூறுகிறார். ஆனால், இது முற்றிலும் 'நேட்டோ அவர் சொல்வதைச் செய்வதை' சார்ந்துள்ளது. அமெரிக்க அதிபர், இந்த இராணுவக் கூட்டணியை உருவாக்கும் 32 உறுப்பு நாடுகளுக்கும் 'மற்றும் உலகிற்கும்' ஒரு சவால் நிறைந்த செய்தியை சனிக்கிழமை (செப்டம்பர் 13) அன்று தனது 'ட்ரூத் சோஷியல்' சமூக வலைதளப் பதிவில் பகிர்ந்துள்ளார்.

நேட்டோ நாடுகள் தனது விதிகளின்படி செயல்பட ஒப்புக்கொண்டால், ரஷ்யா மீது 'பெரும் பொருளாதாரத் தடைகளை' விதிக்கத் தயாராக இருப்பதாக அவர் விளக்கினார். அவ்வாறு செய்யாவிட்டால், அந்நாடுகள் 'தனது நேரத்தை வீணடிக்கின்றன' என்றும் அவர் எச்சரித்தார். போரில் வெற்றி பெறுவதற்கான நேட்டோவின் அர்ப்பணிப்பு '100% க்கும் குறைவாகவே உள்ளது' என்று டிரம்ப் கூறினார். மேலும், பிப்ரவரி 2022 முதல் உக்ரைனில் போர் நடந்து வரும் போதிலும், ரஷ்யாவிடமிருந்து தொடர்ந்து எண்ணெய் வாங்கும் நாடுகளையும் அவர் சுட்டிக்காட்டினார். ஆற்றல் மற்றும் தூய்மையான காற்று ஆராய்ச்சி மையத்தின் (Centre for Research on Energy and Clean Air) படி, சீனா மற்றும் இந்தியாவிற்குப் பிறகு ரஷ்ய எண்ணெயை வாங்கும் மூன்றாவது பெரிய நாடாக துருக்கி உள்ளது.

ஹங்கேரி மற்றும் ஸ்லோவாக்கியா போன்ற நேட்டோ உறுப்பு நாடுகளும் கூட தொடர்ந்து எண்ணெய் கொள்முதலைச் செய்து வருகின்றன. வெள்ளிக்கிழமை (செப்டம்பர் 12) அன்று, பிரிட்டன் ரஷ்ய எண்ணெய் வர்த்தகத்தைத் தண்டிக்கும் நடவடிக்கைகளை எடுத்தது. எண்ணெய் போக்குவரத்திற்காகப் பயன்படுத்தப்பட்ட 70 கப்பல்களுக்குத் தடை விதித்ததும் இதில் அடங்கும். மேலும், ரஷ்யாவிற்கு மின்னணுவியல், இரசாயனங்கள், வெடிபொருட்கள் மற்றும் பிற ஆயுத உதிரிபாகங்களை வழங்கிய சீனா மற்றும் துருக்கியை தளமாகக் கொண்ட நிறுவனங்கள் உட்பட 30 நிறுவனங்கள் மீதும் இங்கிலாந்து பொருளாதாரத் தடை விதித்தது. 'அனைத்து நேட்டோ நாடுகள் மற்றும் உலகிற்கு' எனத் தலைப்பிடப்பட்ட தனது சமூக ஊடகப் பதிவில், டிரம்ப் இவ்வாறு கூறினார்: "நான் ரஷ்யா மீது பெரும் பொருளாதாரத் தடைகளை விதிக்கத் தயாராக இருக்கிறேன். ஆனால், அனைத்து நேட்டோ நாடுகளும் அதைச் செய்ய ஒப்புக்கொண்டு, செயல்படுத்தத் தொடங்க வேண்டும். மேலும், அனைத்து நேட்டோ நாடுகளும் ரஷ்யாவிடமிருந்து எண்ணெய் வாங்குவதை நிறுத்த வேண்டும்".

"உங்களுக்குத் தெரியும், வெற்றி பெறுவதற்கான நேட்டோவின் அர்ப்பணிப்பு 100% க்கும் குறைவாகவே உள்ளது, மேலும் சில நாடுகள் ரஷ்ய எண்ணெயை வாங்குவது அதிர்ச்சியளிக்கிறது! இது ரஷ்யாவுடனான உங்கள் பேச்சுவார்த்தை நிலைப்பாட்டையும், பேரம் பேசும் சக்தியையும் பெரிதும் பலவீனப்படுத்துகிறது. எப்படியாயினும், நீங்கள் தயாராகும்போது நானும் 'செயல்படத்' தயாராக இருக்கிறேன். எப்போது என்று மட்டும் சொல்லுங்கள்?". 

பின்னர், முப்படைகளின் தலைமைத் தளபதி, சீனாவின் மீது கடுமையான வரிகளை விதிக்குமாறு நேட்டோவை வலியுறுத்தினார். இதன்மூலம், ஷி ஜின்பிங் மீது செல்வாக்கைச் செலுத்த முடியும் என்றும், அவர் விளாடிமிர் புடின் மீது போரை முடிவுக்குக் கொண்டுவர அழுத்தம் கொடுக்க முடியும் என்றும் கூறினார். டிரம்ப் மேலும் தொடர்ந்தார்: "இந்த நடவடிக்கையுடன், நேட்டோ ஒரு குழுவாக, சீனாவின் மீது 50% முதல் 100% வரை வரிகளை விதித்து, ரஷ்யா-உக்ரைன் போர் முடிந்த பிறகு அதை முழுமையாகத் திரும்பப் பெறுவது, இந்த கொடிய ஆனால் அபத்தமான போரை முடிவுக்குக் கொண்டுவர பெரிதும் உதவும் என்று நான் நம்புகிறேன்".

"சீனா ரஷ்யாவின் மீது ஒரு வலுவான கட்டுப்பாட்டையும், பிடியையும் கொண்டுள்ளது, இந்த சக்திவாய்ந்த வரிகள் அந்தப் பிடியை உடைக்கும்". 'இது டிரம்ப்பின் போர் அல்ல' என்று கூறி, அவர் மீண்டும் இந்த மோதலிலிருந்து தன்னை விலக்கிக் கொண்டார். மேலும், 'நான் அதிபராக இருந்திருந்தால் இது ஒருபோதும் தொடங்கியிருக்காது' என்றும் கூறினார். "இது பைடன் மற்றும் ஜெலென்ஸ்கியின் போர்," என்று டிரம்ப் தொடர்ந்தார். "நான் இதை நிறுத்த உதவுவதற்காகவும், ஆயிரக்கணக்கான ரஷ்ய மற்றும் உக்ரேனிய உயிர்களைக் காப்பாற்றுவதற்காகவும் மட்டுமே இங்கு இருக்கிறேன் (கடந்த வாரம் மட்டும் 7118 உயிர்கள் பலியிடப்பட்டன. இது பைத்தியக்காரத்தனம்!). நான் சொல்வதை நேட்டோ செய்தால், போர் விரைவில் முடிவுக்கு வரும், மேலும் அந்த உயிர்கள் அனைத்தும் காப்பாற்றப்படும்! இல்லையென்றால், நீங்கள் என் நேரத்தையும், அமெரிக்காவின் நேரம், ஆற்றல் மற்றும் பணத்தையும் வீணடிக்கிறீர்கள்".

நேட்டோ வான்பரப்பில் போலந்தால் பல ரஷ்ய ஆளில்லா விமானங்கள் சுட்டு வீழ்த்தப்பட்ட சில நாட்களுக்குப் பிறகு டிரம்பின் இந்த வார்த்தைகள் வந்துள்ளன. இந்த நிகழ்வை போலந்து பிரதமர் டொனால்ட் டஸ்க், 'இரண்டாம் உலகப் போருக்குப் பிறகு நாம் ஒரு வெளிப்படையான மோதலுக்கு மிக அருகில் இருந்த தருணம் இது' என்று விவரித்தார். அமெரிக்க அதிபர் முன்னர் இந்தச் சம்பவத்தை 'ஒரு தற்செயலான தவறாக இருக்கலாம்' என்று கூறி அதன் தீவிரத்தைக் குறைத்து மதிப்பிட்டிருந்தார். அமெரிக்கா ரஷ்யாவிற்கு எதிராக உறுதியான நடவடிக்கைகளை எடுக்க நாடுகளை ஊக்குவிப்பதாகத் தோன்றுவதால், டிரம்ப் இப்போது மீண்டும் தனது நிலைப்பாட்டை மாற்றிக்கொண்டதாகத் தெரிகிறது.

போலந்தில் நடந்த சம்பவம் குறித்து வெளியுறவுச் செயலர் யெவெட் கூப்பர் முன்பு கூறியிருந்தார்: "புடின் உக்ரைன் மீது தனது காட்டுமிராண்டித்தனமான போரைத் தொடரும்போது இங்கிலாந்து சும்மா பார்த்துக் கொண்டிருக்காது. அவர் நேட்டோ வான்பரப்பிற்குள் பொறுப்பற்ற முறையில் ஆளில்லா விமானங்களை அனுப்பியபோது, இறையாண்மை மீதான அவரது முழுமையான அவமதிப்பு இந்த வாரம் வெளிப்பட்டுள்ளது. ரஷ்யா மீது பொருளாதாரத் தடைகளை அதிகரிக்கவும், இந்த சட்டவிரோதப் போருக்குச் செலவழிக்க அவருக்குத் தேவைப்படும் முக்கியமான பணப்புழக்கத்தைத் துண்டிக்கவும் சர்வதேச நடவடிக்கைகள் எடுப்பது மிகவும் அவசியம்".

வெண்பா (தமிழில்)