சர்வதேச அரசியலில் தனிமைப்படும் அமெரிக்கா

சீனாவுடன் கடுமையாக நடந்துகொள்ளுமாறு ஐரோப்பிய நாடுகளை மிரட்டி வருகிறது அமெரிக்கா. ஆனால், ஐரோப்பிய கூட்டமைப்பிடையே தற்போது நிலவும் சூழலில் அதனால் அமெரிக்காவின் மிரட்டலுக்கு செவிசாய்க்க முடியாது. அமெரிக்க ஜனாதிபதி ஜோ பிடன் பதவியேற்ற சிறிது நேரத்திலேயே இந்த பிரச்சனையை சர்வதேச விவாதங்களில் ஒரு முக்கிய அம்சமாக மாற்றியதன் மூலம், அமெரிக்க நிர்வாகம் குறிப்பாக சீனாவில் கவனம் செலுத்துகிறது. சமீபத்திய மாதங்களில் கருத்துகளும் செயல்களும் அதிகரித்துள்ளன. உதாரணமாக, அமெரிக்க வர்த்தக செயலாளர் ஜினா ரைமொண்டோ, பெய்ஜிங் அமெரிக்க நிறுவனங்களுக்கு வளர்ந்து வரும் அச்சுறுத்தலாக மாறியுள்ளது என்று புதன்கிழமை கூறினார். இந்தச் செய்தி ஐரோப்பாவில் பகிரப்பட்டு அங்கீகரிக்கப்பட்டது. சீனா மீதான ஏற்றுமதி  கட்டுப்பாடுகளைப் பயன்படுத்துவதைக் கருத்தில் கொள்ளுமாறு அமெரிக்க அதிகாரிகள் ஐரோப்பிய அதிகாரிகளிடம் கூறியதாக அறிக்கைகள் தெரிவிக்கின்றன. CNBC தொடர்பு கொண்டபோது, ​​அமெரிக்க வர்த்தகத் துறை உடனடியாகக் கருத்து தெரிவிக்கவில்லை. அமெரிக்க உருவாக்கிய சில தொழில்நுட்பங்கள் சீனாவிற்கு கிடைப்பதை தடுக்கும் வண்ணம்  அமெரிக்கா அக்டோபர் மாதம் பல கட்டுப்பாடுகளை விதித்தது. ஆனால் ஐரோப்பிய ஒன்றியம் பல்வேறு சந்தர்ப்பங்களில் சீனாவை "யுத்ததந்திர போட்டியாளர்" என்று அழைத்தாலும், அது அமெரிக்காவிலிருந்து வேறுபட்ட அணுகுமுறையை பின்பற்றுகிறது. "ஐரோப்பிய ஒன்றியம் தனது சொந்த சீன வெளியுறவு திட்டதை உருவாக்க முயற்சிக்கிறது, இது அமெரிக்காவிலிருந்து வேறுபட்டது, சீனாவுடனான உறவை முற்றாக துண்டித்துகொள்வதற்கு பதிலாக அதன் ஆபத்துகளை குறைக்கவே ஒன்றியம் விரும்புகிறது என்று அமுண்டி அசெட் மேனேஜ்மென்ட்டின் புவிசார் அரசியலின் தலைவர் அன்னா ரோசன்பெர்க், CNBCக்கு அளித்த நேர்காணலில் தெரிவித்தார். 2021 ஆம் ஆண்டில் ஐரோப்பியப் பொருட்களை வாங்குவதில் சீனா மூன்றாவது பெரிய நாடாகவும், இறக்குமதி செய்யப்பட்ட ஐரோப்பிய ஒன்றியப் பொருட்களுக்கான மிக முக்கியமான சந்தையாகவும் இருப்பதாக ஐரோப்பாவின் புள்ளியியல் அலுவலகத்தின் தரவு காட்டுகிறது. ஐரோப்பாவுக்கான சந்தையாக சீனாவின் முக்கியத்துவம், உக்ரைன் மீதான ரஷ்யாவின் படையெடுப்பினால், தன் பொருளாதார சீரமைவிற்காக ஒன்றியம் போராடி வரும் நேரத்தில் மிகவும் பொருத்தமானதாகிறது.

"சீனாவில் இருந்து விலகி ஐரோப்பிய ஒன்றியத்தை அதன் திசையில் இழுக்க அமெரிக்கா முயற்சிக்கும் அதே வேளையில், ஐரோப்பிய ஒன்றியம் சீனாவுடனான பொருளாதார உறவுகளை பராமரிக்க ஆர்வமாக உள்ளது. வரப்போகும் ஆண்டுகளில் போரினால் ஏற்பட்ட பொருளாதார வீழ்ச்சி ஐரோப்பியப் பொருளாதாரங்களை மிகக் கடுமையாகப் பாதிக்கும் என்பதனால், சீனாவுடனான உறவு ஐரோப்பிய ஒன்றியத்திற்கு மிகவும் முக்கியம்” என்று ரோசன்பெர்க் கூறினார்.

சர்வதேச அரசியல் பொருளாதாரத்திற்கான ஐரோப்பிய மையத்தின் சிந்தனையாளர் ஹோசுக் லீ-மகியாமா, சிஎன்பிசியிடம், சீனாவில் அதன் கடுமையான கோவிட்-19 கொள்கையினால்  நிறைய இடைநிறுத்தப்பட்ட தேவை உள்ளது என்றும், சீனாவின் இழப்பை ஈடு செய்ய ஒன்றியத்திற்கு மாற்று சந்தைகள் எதுவும் இல்லை என்றும் கூறினார். ஐரோப்பிய கவுன்சில் தலைவர் சார்லஸ் மைக்கேல் வியாழன் அன்று சீனாவிற்கு விஜயம் செய்திருக்கலாம், பெய்ஜிங் தனது கோவிட் நடவடிக்கைகளை மேலும் எளிதாக்கும் போது "வரிசையில் முதலில்" ஐரோப்பிய ஒன்றியத்தின் இறக்குமதிகளுக்கே முன்னுரிமை அளிக்க வேண்டும் என்று பேச்சுவார்த்தை நடத்த முயற்சி செய்யலாம் என்று அவர் கூறினார். ஜெர்மன் சான்சிலர் ஓலாஃப் ஸ்கோல்ஸும் நவம்பர் தொடக்கத்தில் சீனாவுக்குப் பயணம் செய்தார்.

"ஐரோப்பிய ஒன்றிய-சீனா உறவு உண்மையில் குறுகிய காலத்தில் மேம்படுவதை நாங்கள் காண்கிறோம் மற்றும் மைக்கேலின் தற்போதைய பயணம், ஸ்கோல்ஸ் சீனாவிற்கு விஜயம் செய்த பிறகு மிக நெருக்கமாக வருவது இதற்கு சான்றாகும்" என்று ரோசன்பெர்க் கூறினார். ஐரோப்பிய ஒன்றியத்திற்கும் அமெரிக்காவிற்கும் இடையிலான உறவில் சிறிது கசப்பாக மாறி வரும் நேரத்தில் இந்த சந்திப்புகள் நடக்கின்றன. லீ-மகியாமா, "அட்லாண்டிக் கடல்கடந்த உறவு 20 ஆண்டுகளில் மிக மோசமான நிலையில் உள்ளது" என்றார்.

அமெரிக்க நிர்வாகம் மின்சார கார்கள் உற்பத்திக்கு மாநில மானியங்கள் அளிப்பதற்கு ஆதரவான நிலை மேற்கொள்வதாக ஐரோப்பிய அதிகாரிகள் புகார் அளித்துள்ளனர். இது சர்வதேச வர்த்தக விதிகளுக்கு புறம்பானவை எனவும், ஐரோப்பிய நிறுவனங்களுக்கு அச்சுறுத்தலாகவும் இருப்பதாக ஐரோப்பிய ஒன்றியம் தெரிவித்துள்ளது. பிரான்சின் ஜனாதிபதி இம்மானுவேல் மக்ரோன் வியாழன் அன்று பைடனுடன் பேச்சுவார்த்தை நடத்தினார், அதில் இரு நாடுகளிடையே நிலவும் இது போன்ற கருத்து வேறுபாடுகளில் சிலவற்றைக் குறைக்கவும் புதிய வர்த்தக மோதலைத் தவிர்க்கவும் வலியுறித்தினார்.

- மருதன்

(தமிழில்)

மூலக்கட்டுரை : https://www.cnbc.com/2022/12/02/the-us-wants-the-eu-to-be-strict-with-china-but-europe-cant-afford-it.html