விதை மசோதாவும் விவசாயிகளின் போராட்டமும்

1
விதை இறையாண்மையைப் பாதுகாத்தல்: கார்ப்பரேட் ஆதிக்கத்திற்கு எதிராக விவசாயிகள் போராட்டம்

பன்னாட்டு நிறுவனங்களின் (MNCs) கட்டுப்பாட்டை வரைவு விதை மசோதா வலுப்படுத்துவதாகக் குற்றம் சாட்டி, சம்யுக்த கிசான் மோர்ச்சா போராட்டம் நடத்த உள்ளது.

வரைவு விதை மசோதா குறித்து பொதுமக்கள் தங்கள் கருத்துக்களைத் தெரிவிக்க டிசம்பர் 11 கடைசி நாளாக உள்ள நிலையில், பல்வேறு விவசாய அமைப்புகளின் கூட்டமைப்பான சம்யுக்த கிசான் மோர்ச்சா (SKM), திங்களன்று மசோதாவின் பிரதிகளை எரிக்குமாறு விவசாயிகளை வலியுறுத்தியுள்ளது. இந்த முன்மொழியப்பட்ட சட்டமானது, "விதை விநியோகத்தின் மீதான கட்டுப்பாட்டை பன்னாட்டு நிறுவனங்கள் மற்றும் கார்ப்பரேட் நிறுவனங்களிடம்  ஒப்படைக்கும்" என்று அது கூறியுள்ளது. அதன் அறிக்கையில், இந்த விதை மசோதா என்பது கூட்டாட்சி உரிமைகளை நசுக்கவும், உணவுப் பாதுகாப்பு மற்றும் விதை இறையாண்மையைச் சிதைக்கவுமான மற்றொரு சட்டமாகும் என்று SKM தெரிவித்துள்ளது.

மத்திய வேளாண்மை மற்றும் விவசாயிகள் நல அமைச்சகம் நவம்பர் 12 அன்று இந்த வரைவு மசோதாவை அறிவித்தது. இந்த வரைவு 1966-ஆம் ஆண்டின் விதைச் சட்டத்திற்கு மாற்றாக கொண்டு வரப்பட்டுள்ளது. "இந்திய விதைத்துறையில் பன்னாட்டு கார்ப்பரேட் ஆதிக்கத்தை நிலைநாட்டி, உணவுப் பாதுகாப்பு மற்றும் விதை இறையாண்மையைக் கடுமையாகச் சீர்குலைத்து, மாநிலங்களின் கூட்டாட்சி உரிமைகளை நசுக்கும் இந்த பிற்போக்குச் சட்டத்தை SKM வன்மையாகக் கண்டிக்கிறது; எனவே, இதனை உடனடியாகத் திரும்பப் பெற வேண்டும் என்று கோருகிறது," என SKM தெரிவித்துள்ளது.

இந்த வரைவு மசோதா விதை விநியோகத்தின் மீதான கட்டுப்பாட்டை பன்னாட்டு மற்றும் கார்ப்பரேட் நிறுவனங்களிடம் ஒப்படைக்கும் என்றும், இதன் மூலம் வேளாண் சட்டம் எட்ட முயன்ற அதே இலக்கை இது நிறைவேற்றும் என்றும் SKM கூறியுள்ளது. "இது கார்ப்பரேட் நிறுவனங்களின் சந்தை நலன்களுக்காகப் பயிர் முறைகளை மாற்றும். உணவுப் பாதுகாப்பு, விவசாயிகளின் நிதிப் பாதுகாப்பு மற்றும் லாபகரமான விவசாயத்தை உறுதி செய்வதற்காக சந்தையில் மலிவான மற்றும் தரமான விதைகள் சரியான நேரத்தில் கிடைப்பதை உறுதி செய்வது பற்றி இதில் எந்தக் குறிப்பும் இல்லை. இவைதான் எந்தவொரு அரசாங்கத்தின் விதை மசோதாவின் முக்கிய நோக்கமாக இருக்க வேண்டும். துரதிர்ஷ்டவசமாக மோடி அரசு இதனை முற்றிலும் புறக்கணித்து, இந்தியாவில் வாழ்வாதாரத்திற்கு அத்தியாவசியமான விவசாயத்திற்குப் பேரழிவைக் கொண்டுவர முயல்கிறது," என்று அந்த அறிக்கையில் கூறப்பட்டுள்ளது.

இந்த மசோதா விதைத்துறையை கார்ப்பரேட் மயமாக்குவதை நோக்கமாகக் கொண்டுள்ளது என்றும், இது "பன்னாட்டு நிறுவனங்கள் இந்தியப் பல்லுயிர் பெருக்கத்தின் மூலம் பெருமளவில் லாபம் ஈட்டவும், நாட்டின் உணவுப் பாதுகாப்பு மற்றும் விதை இறையாண்மையைச் சிதைக்கவும் வழிவகுக்கும்" என்றும் கூறி, மசோதாவுக்கு எதிராக அணிதிரளுமாறு விவசாயிகளை SKM கேட்டுக்கொண்டது. கூட்டாட்சி உரிமைகள் மற்றும் விதை இறையாண்மையைப் பாதுகாப்பதற்காக, 2025 டிசம்பர் 8 அன்று இந்தியா முழுவதும் உள்ள கிராமங்களில் விதை மசோதாவின் பிரதிகளை எரிப்பதன் மூலம் போராட்டத்தில் இணையுமாறு விவசாயிகளுக்கு SKM வேண்டுகோள் விடுப்பதாக அந்த அறிக்கையில் தெரிவிக்கப்பட்டுள்ளது.

https://www.thehindu.com/news/national/samyukt-kisan-morcha-to-protest-draft-seeds-bill-alleges-it-strengthens-control-of-mncs/article70369573.ece

=========================================================

2
வேளாண் கார்ப்பரேட் மயமாக்கல் மற்றும் வளங்கள் மையப்படுத்தலுக்கு எதிரான போராட்டங்கள் 

சம்யுக்த கிசான் மோர்ச்சா (SKM) விடுத்த அழைப்பின் பேரில், பல்வேறு விவசாய அமைப்புகள் டிசம்பர் 8 பஞ்சாப் மற்றும் இந்தியாவின் பல மாநிலங்களில் மின்சார (திருத்த) மசோதா 2025 மற்றும் விதைகள் மசோதா 2025 ஆகியவற்றை எதிர்த்து அவற்றின் நகல்களை எரித்து போராட்டங்களில் ஈடுபட்டன. விவசாயிகள், தொழிலாளர் சங்கங்கள்  மற்றும் துணைமின் அலுவலகங்களில் தங்கள் எதிர்ப்பைப் பதிவு செய்தனர். இந்திய மின் அமைப்பை பெரிய அளவில் தனியார்மயமாக்கவும், வணிகமயமாக்கவும் மற்றும் மையப்படுத்தவும் இந்த வரைவு மின்சார (திருத்த) மசோதா 2025 உருவாக்கப்பட்டுள்ளது. இது நடைமுறைக்கு வந்தால், பல தசாப்தங்களாக உருவாக்கப்பட்ட சமூக நலன் சார்ந்த மின்சாரக் கட்டமைப்பை சிதைத்து, லாபம் தரும் மின் விநியோகம் மற்றும் உற்பத்தியை தனியார் நிறுவனங்களுக்கு தாரை வார்க்கும்; இதனால் பொதுத்துறை நிறுவனம் நஷ்டங்களை சந்தித்து சமூகக் கடமைகளை நிறைவேற்ற முடியாத நிலை  உருவாகும் என்று SKM தெரிவித்துள்ளது.

மானியங்களை ரத்து செய்வது ஏழை மற்றும் கிராமப்புற குடும்பங்களின் மின் கட்டணத்தை உயர்த்தி, சமூக ஏற்றத்தாழ்வை அதிகரிக்கும். விவசாயிகளை மேலும் துயரத்தில் தள்ளும். கார்ப்பரேட் நிறுவனங்களின் நலனுக்காக எடுக்கப்படும் இந்த நடவடிக்கை விவசாயிகள், தொழிலாளர்கள் மற்றும் பொதுமக்களுக்கு எதிரானது என்று SKM கூறியுள்ளது. மேலும், சிறு விவசாயிகளின் உரிமைகளைப் பறிக்கவும், இந்தியாவின் விதை இறையாண்மையை (seed sovereignty) ஒரு சில பன்னாட்டு மற்றும் உள்நாட்டு ஏகபோக நிறுவனங்களிடம் ஒப்படைக்கவும் மத்திய அரசு மேற்கொள்ளும் மிகப்பெரிய அரசியல் திட்டத்தின் பகுதியே இந்த விதைகள் மசோதா என்று விவசாய அமைப்பு கூறியுள்ளது. ஏகபோக நிறுவனங்கள் விதைகளுக்கு கொள்ளை விலையை (predatory pricing) நிர்ணயிக்க வழிவகுப்பதன் மூலம் விவசாயிகளை நசுக்கவும், விவசாயிகளின் மற்றும் மாநில அரசுகளின் உரிமைகளைப் பறிக்கவும் இந்த மசோதா முயல்கிறது.

வரைவு விதை மசோதா 2025, இந்தியாவின் தாவர ரகங்கள் மற்றும் விவசாயிகள் உரிமைகள் பாதுகாப்பு (PPVFR) சட்டம், 2001 மற்றும் உயிரியல் பன்முகத்தன்மை குறித்த சர்வதேச ஒப்பந்தங்களிலிருந்து வெகுவாக விலகிச் செல்கிறது. இது விதைத்துறையில் கார்ப்பரேட்களுக்கு அதிக சாதகமான சூழலை உருவாக்குகிறது. இந்தியாவில் வேளாண் நெருக்கடி அதிகரித்துக் கொண்டிருக்கும் சூழலில், NDA அரசு இந்த கார்ப்பரேட் ஆதரவு மசோதாக்களைத் திணிக்கிறது என்று SKM குற்றம் சாட்டியுள்ளது. விவசாயத்தில் கார்ப்பரேட் ஆதிக்கம் அதிகரிப்பது, விவசாய நெருக்கடியைத் தீவிரப்படுத்தி விவசாயிகளின் தற்கொலைகளுக்கு வழிவகுக்கும் என்று பல அறிவியல் ஆய்வுகள் உறுதிப்படுத்தியுள்ளன.

இந்தச் சூழலானது, "வேலியே பயிரை மேய்வது போல", விவசாயிகளைப் பாதுகாக்க வேண்டிய சட்டங்களே அவர்களின் வாழ்வாதாரத்திற்கும் இறையாண்மைக்கும் அச்சுறுத்தலாக அமைந்திருப்பதை உணர்த்துகிறது.

https://timesofindia.indiatimes.com/city/chandigarh/farm-bodies-protest-electricity-seeds-bills-terms-these-assault-on-state-rights/articleshow/125844569.cms

========================================================================

3
இந்தியாவின் 2025 விதை மசோதாவிற்கு எதிரான போராட்டங்கள்

விதை மசோதா மற்றும் விவசாயிகளின் போராட்டம்

டிசம்பர் 8, அன்று, இந்தியாவின் இறையாண்மைக்கு அச்சுறுத்தலாக விளங்கும் புதிய 2025 வரைவு விதை மசோதாவிற்கு எதிராக நாடு முழுவதும் லட்சக்கணக்கான விவசாயிகள் போராட்டங்களை நடத்தினர். இந்த மசோதா நாட்டின் உணவுப் பாதுகாப்பு மற்றும் விதை இறையாண்மையைச் சிதைக்கும் என்று கூறி, விவசாயிகள் அதன் பிரதிகளை எரித்து உடனடியாகத் திரும்பப் பெறக் கோரினர். 2020-ல் உருவாக்கப்பட்ட பல்வேறு விவசாய அமைப்புகளின் கூட்டமைப்பான சம்யுக்த கிசான் மோர்ச்சா (SKM) இந்தப் போராட்டத்திற்கு அழைப்பு விடுத்திருந்தது. விவசாயிகள் தங்கள் கிராமங்கள் மற்றும் நகரங்களில் பதாகைகளுடன் திரண்டு, விதை மசோதாவுடன் சேர்த்து பல ஆண்டுகளாக அவர்கள் எதிர்த்து வரும் மின்சார மசோதாவின் பிரதிகளையும் எரித்தனர். மத்திய வேளாண் அமைச்சகத்தால் நவம்பர் 12 அன்று அறிவிக்கப்பட்ட இந்த மசோதா, தற்போது நடைமுறையிலுள்ள 1966-ஆம் ஆண்டின் விதைச் சட்டத்திற்கு மாற்றாகக் கொண்டுவரப்பட்டுள்ளது.

அரசின் வாதமும் விவசாயிகளின் அச்சமும்

பாஜக அரசு, இந்த மசோதா கடுமையான தரக் கட்டுப்பாடு மற்றும் விதிமீறல்களுக்கான தண்டனைகள் மூலம் விதை விதிகளை நவீனமயமாக்கும் என்று கூறுகிறது. ஆனால், SKM அமைப்பு இதனை ஒரு "பிற்போக்கான சட்டம்" என்று சாடியுள்ளது. இது இந்திய விதைத்துறையில் பன்னாட்டு நிறுவனங்களின் (MNCs) ஆதிக்கத்தை நிலைநாட்டி, நாட்டின் விதை இறையாண்மையை பறித்துவிடும் என்று அவர்கள் குற்றம் சாட்டுகின்றனர். இந்த மசோதா விவசாயிகளுக்கும், இந்தியாவின் பல்லுயிர் பெருக்கத்திற்கும், நாட்டின் கூட்டாட்சி அமைப்புக்கும் எதிரானது என்று SKM தெரிவிக்கிறது. இந்தியாவின் உழைக்கும் சக்தியில் பாதிக்கும் மேற்பட்டோர் விவசாயத்தில் ஈடுபட்டுள்ள நிலையில், பெரும்பாலானோர் விதைகளுக்காகத் தங்களின் சொந்தச் சேமிப்பு அல்லது உள்ளூர் விநியோகஸ்தர்களையே நம்பியுள்ளனர்.

நிறுவனங்களின் ஆதிக்கம் மற்றும் வாழ்வாதாரப் பாதிப்பு

புதிய மசோதா அமலுக்கு வந்தால், விதை விநியோகத்தில் பன்னாட்டு நிறுவனங்களின் பிடி இறுகும், இதனால் உள்ளூர் மற்றும் பொதுத்துறை நிறுவனங்களிடம் விதைகளைப் பெறும் நெகிழ்வுத்தன்மை விவசாயிகளுக்கு இல்லாமல் போகும். இது உள்நாட்டு ரகங்கள், பொது நிறுவனங்கள் மற்றும் பாரம்பரிய விதை வலைப்பின்னல்களை அழித்து, இந்தியாவின் வாழ்வாதாரமான விவசாயத்திற்குப் பெரும் பேரழிவை ஏற்படுத்தும் என்று SKM எச்சரிக்கிறது. தரமான மற்றும் மலிவான விதைகள் சரியான நேரத்தில் கிடைப்பதற்கான எந்த உத்தரவாதமும் இந்த மசோதாவில் இல்லை. மேலும், 2021-ல் ஓராண்டு கால போராட்டத்திற்குப் பிறகு திரும்பப் பெறப்பட்ட வேளாண் சட்டத்தின் அம்சங்களை மீண்டும் கொண்டு வரும் ஒரு முயற்சியாகவே இது பார்க்கப்படுகிறது.

கூட்டாட்சி தத்துவத்திற்கு ஏற்படும் பாதிப்பு

இந்த மசோதா மாநில அரசுகளின் அதிகாரங்களை பறித்து, பன்னாட்டு நிறுவனங்களைக் கட்டுப்படுத்தும் திறனை முடக்குகிறது. பன்னாட்டு நிறுவனங்கள் தாங்கள் வழங்கும் விதைகளை எந்தவித துறைசார் ஆய்வும் இன்றி தாங்களே சுய-சரிபார்ப்பு (self-validate) செய்துகொள்ள இந்த மசோதா அனுமதிக்கிறது. இது உள்ளூர் விநியோகஸ்தர்களைப் பாதிப்பதோடு, விவசாயிகளின் உரிமைகளையும் பலவீனப்படுத்தும். இறக்குமதி செய்யப்படும் விதைகள் இந்திய அதிகாரிகளின் மேற்பார்வையில் சோதனை செய்யப்படாது என்பது, வெளிநாட்டு நிறுவனங்களுக்கு அரசு பணிந்து போவதைக் காட்டுகிறது என்று SKM குற்றம் சாட்டியுள்ளது. ஒட்டுமொத்தமாக, இந்த மசோதா விவசாயிகளின் நலன்களுக்கு இழைக்கப்படும் துரோகம் என்று அவர்கள் கருதுகின்றனர்.

https://peoplesdispatch.org/2025/12/10/indian-farmers-protest-new-seed-bill-calling-it-a-threat-to-the-countrys-sovereignty/

வெண்பா (தமிழில்)

Disclaimer: இந்தப் பகுதி கட்டுரையாளரின் பார்வையை வெளிப்படுத்துகிறது. செய்திக்காகவும் விவாதத்திற்காகவும் இந்த தளத்தில் வெளியிடுகிறோம் – செந்தளம் செய்திப் பிரிவு